Almatyda «2010 jyldyń eń úzdik ekologııalyq jobasy» atty baıqaý jarııalandy
ALMATY. Aqpannyń 24-i. QazAqparat /Názıra Eleýhan/- Almatyda qala ákimi Ahmetjan Esimovtyń tapsyrýy boıynsha 2009-2018 jyldary Almaty qalasynda qorshaǵan ortanyń zalaldanýyn tómendetý maqsatynda jasalǵan Keshendi baǵdarlama aıasynda qala ákimdigi «2010 jyldyń eń úzdik ekologııalyq jobasy» atty baıqaý jarııalady,
dep habarlaıdy QazAqparat qala ákimshiliginiń baspasóz qyzmetine silteme jasap.
Baıqaý eki baǵyt boıynsha ótetin bolady. Birinshisi - «Tabıǵatty qorǵaýdyń úzdik jobalary» dep atalady. Oǵan qala kásiporyndary, ǵalymdar men ónertapqyshtar qatysady. Olar úshin «Atmosferalyq aýany qorǵaýdyń úzdik jobasy, «Kommýnaldyq qaldyqtardy qaıta óńdeýdiń úzdik jobasy», «Sý resýrstaryn qorǵaýdyń úzdik jobasy» atty úsh atalym qarastyrylǵan. Bul atalymdar boıynsha ótinishter 2010 jyldyń mamyr aıynyń 1-ne deıin qabyldanady.
Ekinshi baǵyt - «Qalany kórkeıtýdiń úzdik landshaftyq sheshimderi» dep atalady. Munda da úsh nomınantsııa qarastyrylǵan. Birinshi - «Aımaqty kógaldandyrýdyń úzdik dızaınerlik sheshimi» dep atalatyn atalymǵa jasyldandyrý men landshaft dızaınymen aınalysatyn uıymdar qatysa alady. Buǵan qatysýshylar naqtyly ýchaskelerdi jasyldandyrý jobalaryn usynýlary qajet. Ekinshi «Almaty kósheleri» dep atalatyn atalym - qala aýdandary arasynda ótedi. Oǵan kóshelerdi ásemdeý, gúlmen kómkerý, úıler fasadtaryn bezendirý kiredi. Al úshinshi atalym «Súıikti aýla» dep atalady. Buǵan JPIK men PKSD-lar qatysady. Bul baıqaýǵa qatysý úshin ótinish aǵymdaǵy jyldyń sáýir aıynyń 1-ne deıin qabyldanady. Atalǵan baıqaýlardyń qorytyndysy eki kezeńde birinshisi - Qorshaǵan ortany qorǵaý Búkilálemdik kúninde, ekinshisi - Qala kúninde shyǵatyn bolady.
Baıqaý komıssııasynyń quramyna tabıǵı resýrstar jáne tabıǵatty paıdalanýdy retteý basqarmasy, ishki saıasat basqarmasy, bilim basqarmasy, Balqash-Alakól ekologııalyq departamenti, sonymen qatar joǵary oqý oryndary men BAQ ókilderi enedi.
Marapattaý rásimi «Qala kúni» merekesinde ótetin bolady. Baıqaý jeńimpazdary 1, 2, 3-inshi dárejeli dıplomdarmen jáne baǵaly syılyqtarmen marapattalady.
