Almatyda 2009 - 2010 jyldar aralyǵynda qańǵybas ıtterdiń 40 myńy aýlandy
ALMATY. 4 qazan. QazAqparat /Názıra Eleýhan/ - Úısiz júrgen janýarlardy baqylaý ádisi elimizde tıimsiz júrgizilýde.
2009 jyly Almatyda ıesiz ıtterdiń sany 16 myń boldy. 2009 - 2010 jyldar aralyǵynda qańǵybas ıtterdiń 40 myńy aýlanyp, óltirildi. Oǵan bıýdjetten 120 mln. teńge bólindi. Biraq, atqarylyp jatqan isterge qaramastan 2010 jáne 2011 jylǵy esep ıesiz ıtterdiń qaıta kóbeıgendigin kórsetip otyr. Qazir Almatyda qańǵybas ıtterdiń sany 16 500- 17 300 aralyǵynda. Bul jaǵdaı búginde elimizdiń barlyq jerinde sıpat alýda. Búgin Almatyda Dúnıejúzilik janýarlar kúnine oraı ótkizilgen baspasóz máslıhatynda "KARE - Zabota" qoǵamdyq qorynyń vıtse-prezıdenti Natalıa Aleksandrova osylaı málim etti.
Onyń aıtýynsha, qoldanylyp jatqan ádisterdiń tıimsizdigi tıisti oryndardyń máseleniń túpki tamyryna nazar salmaı, aýrýlardyń belgilerin joıýmen aınalysýynda jatyr.
"Iesiz ıtterdiń kóshede júrýi, qańǵybas ıtterdiń sanynyń kóbeıýi adamdardyń óz qolymen jasap otyrǵan isi. Ony tipti, adamdardyń tómengi mádenıetinen dep te aıtýǵa bolady. Biz osy máselege barlyq adamzatty nazar aýdarýǵa shaqyryp, óz asyraýyndaǵy janýarlarǵa "úlken jaýapkershilikpen" qaraýdy suraımyz. Sonda ǵana bul másele sheshimin tabady",-dedi N. Aleksandrova.
Onyń aıtýynsha, janýarlarǵa arnalǵan panalardyń barlyǵy jeke menshikte. "Olardy ustaý orny qarapaıym normalarǵa saı emes. Qazirgi ýaqytta barlyq ýaqytsha oryndar tolyp tur. Qoǵamda janýarlarǵa degen súıispenshilik pen adamgershilikti qalyptastyrý qajet, sonda úısiz, panasyz janýarlardyń sany azaıady",-dedi ol.
