Almatyda 2007 jyldan beri úleskerlerdiń úmitin aqtamaǵan qurylys kompanııalaryna qatysty 17 qylmystyq is qozǵaldy
ALMATY. Tamyzdyń 11-i. QazAqparat /Erbol Azanbek/ - Qazirgi kezde Almatyda 6 153 úleskeri bar 27 turǵyn úı kesheniniń qurylysy jalǵasýda.
Jyl basynan beri 6 turǵyn úı kesheniniń 2 049 úleskeriniń máselesi sheshildi. Bul týraly búgin Almatyda quqyq qorǵaý máselesi boıynsha ótken arnaıy keńes barysynda qala prokýrory Ámirhan Estaev aıtty.
Onyń aıtýynsha, 27 keshenniń 6-ýy problemaly nysandar qatarynda. «Prokýratýra tarapynan basqa da quqyq qorǵaý organdarymen birlesip aldanǵan úleskerler paıdasyna alaıaq qurylys kompanııalaryn jazalaý sharalary qatańdatyldy. Úleskerler máselesi bastalǵan 2007 jyldan beri qurylys kompanııalarynyń basshylaryna qatysty 17 qylmystyq is qozǵaldy. Onyń 7-ýi boıynsha 23 tulǵa 1 jyldan 19 jylǵa deıin sottaldy», dedi qala prokýrory. Qazirgi kezde qarjy polıtsııasynyń qaraýynda 3 qylmystyq is, 5 tekserýge deıingi materıal jatyr. Bular boıynsha úleskerlerge keltirilgen zalal 30 mıllıard teńgeden asady. Jalpy alǵanda alaıaq qurylys kompanııalary úleskerlerden 47 mıllıard teńge tartqan. Onyń 17 mıllıardy jer ýchaskelerin satyp alýǵa jumsalǵan. Quqyq qorǵaý organdarymen qazirgi kezde qurylys kompanııalarynyń 22 mıllıard teńgelik múlki tutqyndalǵan. Bunymen qatar tutqynda quny anyqtalmaǵan múlikter de bar. Qazirgi kezde bul múlikterdi úleskerler paıdasyna berý jumystary jalǵasýda. «2009 jyly úleskerlerdiń úlesin qaıtarý maqsatynda 6 aryz boıynsha 3 mıllıard 461 mıllıon teńge óndirilip berilgen. Bıylǵy jyldyń ótken aılarynda sot organdaryna prokýratýra tarapynan 9 úleskerdiń shaǵymy berilip, onyń 4-ýi boıynsha 1 mıllıard 869 mıllıon teńge óndirilip berildi», dedi Á.Estaev.
