Almatyda 200 myńǵa jýyq aǵash otyrǵyzý josparlandy
ALMATY. QazAqparat – Almaty qalasy Medeý aýdanynda 200 myńǵa jýyq aǵash otyrǵyzý josparlandy. Bul týraly aýdan ákimi Sultanbek Mákejanov málim etti, dep habarlaıdy QazAqparat tilshisi.
2019 jyly 15 tamyzda ÚEU men qala belsendileriniń qatysýymen ótken qalany kógaldandyrý jıynynda Almaty ákimi Baqytjan Saǵyntaev úsh jyldyq Jasyl Almaty jobasynyń júzege asyrylýyn qamtamasyz etip, 2022 jylǵa deıin mıllıon aǵash otyrǵyzýdy tapsyrdy.
Osyǵan baılanysty Medeý aýdandyq ákimdigi «Medeý-2023» Strategııalyq josparyn daıyndap jatyr. Onda aýdandy damytýǵa arnalǵan barlyq baǵyt qarastyrylǵan, onyń ishinde kógaldandyrý, qorshaǵan ortany qorǵaý men ekologııa máseleleri de bar.
«Jospar aıasynda úsh jylda 180-200 myń aǵash otyrǵyzýdy josparlap otyrmyz. Aǵash otyrǵyzýǵa arnalǵan oryn men lokatsııany anyqtap qoıdyq. Byltyr Jasyl ekonomıka basqarmasy Kók-Tóbe aýmaǵynda 100 myńǵa jýyq buta men kóshet otyrǵyzdy», - dedi S.Mákejanov.
Brıfıng kezinde kóshet otyrǵyzýǵa Shyǵys aınalma joly, Halyq Arena aýmaǵy, Jarbulaq, Esentaı, Kishi Almaty ózenderiniń mańynan, sonymen qatar Býtakovkadan arnaıy jerler bólinetini aıtyldy. Medeý aýdanyn damytý jospary aıasynda aýdanda ornalasqan ózen aýmaqtaryn abattandyrý jumystary júrgiziledi.
