Almatyda 200 kósheniń shamdary aýystyrylyp jatyr
ALMATY. QazAqparat - Almaty kóshelerin jaryqtandyrý aıasynda qalanyń kórikti jerleri men kósheleri jańa jaryqtandyrý júıesimen qamtyla bastady, dep habarlaıdy QazAqparat tilshisi.
Jańa dıodty shamdar Almatynyń 200 kóshesinde ornatylyp jatyr. Jańa shamdar energııany únemdeıdi, zalaldy zattar joq.
Memlekettik-jekeshelik áriptestik aıasynda keler jyldan bastap 1 375 shaqyrym syrtqy jaryq jelisi nemese 45 myń sham men 42 myń baǵana jańartý josparlanǵan. Qazirdiń ózinde gaz toltyrylǵan jaryq kózderi jańa dıodty shamdarǵa aýystyrylýda, qalanyń barlyq aýdandarynda 200-den astam kóshege syrtqy jaryqtyń jańa jelisi tartylady.
Abaı, Abylaı han jáne Nazarbaev dańǵyldarynda dıodty shamdary bar 700-den astam baǵana aýystyryldy.
Aıta keterligi, jaryq kózderi qalanyń ortalyǵynda ǵana emes, ekinshi deńgeıli kóshelerinde de qolǵa alynǵan. Mysaly, Alataý aýdanynyń - 33, Áýezov aýdanynyń - 64, Túrksib aýdanynyń -39, Bostandyq aýdanynyń - 12, Naýryzbaı aýdanynyń - 8, Jetisý jáne Medeý aýdandarynyń árqaısysynyń 32 kósheniń jaryq jelileri jańardy. Qaıta jańarǵan 1 400 aýlaǵa da jańa jaryq kózderi ornatyldy. Keler jyly taǵy 600 aýla jaryqtandyrylady jáne abattandyrylady.
Megapolıstiń kórikti jerleriniń 130-dan astam ǵımaraty, atap aıtsaq, Respýblıka Saraıy, Táýelsizdik Monýmenti, Dańq Memorıaly, Kóktóbe telemunarasy, Abaı atyndaǵy qazaq memlekettik akademııalyq opera jáne balet teatry, Áýezov jáne Lermontov teatrlary, Qasteev mýzeıi, Yqylas atyndaǵy halyq aspaptary murajaıy, Ortalyq meshit, Svıato-Voznesensk kafedraldy sobory, «Qazaqstan» qonaq úıi jańasha túske boıaldy. Barlyq jobalar bıýdjetten tys qarjy esebinen júzege asýda. Sonymen qatar, túngi nurlandyrý arqasynda Qazaqstan-Nemis ýnıversıtetiniń nysany erekshe kórinetin boldy.
Dıspetcherlik qyzmettiń jumysyn jandandyrý, basqarý júıelerinde sónip qalýdy boldyrmaý ári bir komanda boıynsha qalada jaryqty bir mezgilde berip, óshiretin baǵdarlama jasaldy.
