Almatyda 200 gektar aýmaqta qurǵaq shóp ósken jer jyrtyldy
ALMATY. QazAqparat- Almatyda órttiń aldyn alý maqsatynda 200 gektar aýmaqta qurǵaq shóp ósken jer jyrtyldy. Bul týraly Óńirlik kommýnıkatsııalar qyzmetiniń brıfınginde qalalyq Tótenshe jaǵdaılar departamentiniń bastyǵy Rýslan Qasybaev aıtty, dep habarlaıdy QazAqparat tilshisi.
Spıkerdiń sózinshe, qurǵaq shóp órti 52 paıyzǵa azaıdy. Byltyr 162 fakti tirkelse, 2022 jyly 77 jaǵdaı oryn alǵan.
«Aıtarlyqtaı, órt aýmaǵy 80%-ǵa azaıyp, bıyl 2,8 gektardy qurasa, ótken jyly órtke oranǵan aǵashtyń jalpy kólemi 13,5 gektar bolǵan. Órttiń shyǵýyna kóp jaǵdaıda otqa abaısyz qaraý jáne shabylmaǵan qurǵaq ósimdikter sebep boldy», - dedi Almaty qalalyq TJD bastyǵy.
Rýslan Qasybaev jeke sektor turǵyndaryna da osy taqyryp tóńireginde usynys aıtty.
«Birinshiden, kez kelgen azamat 101 nemese 112 telefondaryna habarlasyp, órttiń shyǵý ornyn aıtyp, ne janyp jatqanyn naqtylaýy kerek. Múmkindik bolsa jáne qaýip tónbese, órtti joıý sharalaryn qoldaný qajet. Qaýip tóngen jaǵdaıda, qutqarýshylardy kútken abzal», - dedi Rýslan Qasybaev.
Sonymen qatar, ol bıyl qurǵaq shóptiń órtenýi saldarynan jalynnyń turǵyn úılerge jaıylǵanyn atap ótti.
«Alataý aýdanynyń Shal Qolda kóshesiniń boıynda 1000 sharshy metr aýmaqta qurǵaq shóp órtenip, qyzyl jalyn salynyp jatqan jeke turǵyn úıge aýysty. Órtti sóndirýge 27 órt sóndirýshi jumyldyryldy, órt bir saǵat ishinde joıyldy, zardap shekkender joq», - dedi spıker.
Almaty qalasy Tótenshe jaǵdaılar departamentiniń basshysy megapolıs turǵyndary men qonaqtaryn aýa raıynyń ystyqtyǵyn eskere otyryp, temeki tuqyldaryn qurǵaq shópke tastamaýǵa, aýmaqty, ásirese, baý-baqsha ýchaskelerin qurǵaq shópten aldyn ala tazartýǵa shaqyrdy.
