Almatyda 20 sáýirden jumys isteıtin kásiporyndarǵa qoıylatyn talaptar aıqyndaldy
ALMATY. QazAqparat - Baqytjan Saǵyntaev Almatydaǵy 20 sáýirden bastap jumysy jandanýy tıis kásiporyndar men qurylys kompanııalarynyń basshylarymen onlaın kezdesý ótkizdi, dep habarlaıdy QazAqparat tilshisi.
Jınalǵandar eń aldymen jumysshylardyń qaýipsizdigi máselelerin talqylady.
«Bul protsesti biz 20 sáýirden bastap iske qosamyz. Basty talap sanıtarlyq-epıdemıologııalyq qaýipsizdikti saqtaý jáne jumyskerlerdiń densaýlyǵyna qaýip tóndirmeý», – dedi ákim.
Qala basshysy bul talapty buzǵan kásiporyndarǵa TJ aıaqtalǵansha jumys isteýge tyıym salynatynyn aıtty.
«Atameken» UQK, ákimdik, qalalyq Taýarlar men qyzmetterdiń sapasy men qaýipsizdigin baqylaý departamenti qyzmetkerlerinen turatyn komıssııa aldaǵy 2-3 kún ishinde kásiporyndardyń daıyndyǵyn tekseredi. Basty nazar jeke qorǵanys quraldarynyń, sanıtaızerlermen jabdyqtalýyna, óndiristik jáne keńse úı-jaılaryn óńdeýge, kireberistegi qyzmetkerlerdiń dene qyzýyn baqylaýǵa jáne sanıtarlyq qorǵaýdy qamtamasyz etýdiń basqa da sharalaryna aýdarylatyn bolady.
Jekelegen salalar boıynsha arnaıy ázirlengen hattamalarda kórsetilgen talaptarǵa sáıkes kelgen kezde qyzmetke ruqsat beretin akt beriledi. Turaqty monıtorıng kezinde zań buzýshylyqtar anyqtalǵan jaǵdaıda akt keri qaıtarylyp, qyzmeti toqtatylady.
Kásiporyn basshylary jumysty jańa jaǵdaıda bastaýǵa jáne óz qyzmetkerleriniń qaýipsizdigin qamtamasyz etýge daıyn ekendikterin bildirdi.
Olar ákimdik pen Jedel shtab qabyldaǵan qalanyń ekonomıkalyq belsendiligin qalpyna keltirýge baǵyttalǵan sheshimderdi qoldady.
Buǵan deıin habarlanǵandaı , Almatyda jumyspen qamtylǵandar sany 728 myń adamǵa qysqardy. Olardyń ishinde qarjy sektorynda, sondaı-aq bilim berý, memlekettik basqarý, aqparat jáne baılanys salalarynda jumys isteıtin 200 myń adam qashyqtan jumys jasaý rejımine kóshken.
20 sáýirden bastap ónerkásip kásiporyndarynyń, qurylys salasyndaǵy kompanııalardyń, qurylys materıaldarynyń kóterme saýda naryǵynyń jumysyn iske qosý josparlanyp otyr. Sondaı-aq, notarıýstar jáne Almatynyń Naýryzbaı aýdanyndaǵy HQKO-nyń bir keńsesi tek bızneske qyzmet kórsetý úshin jumys isteıdi.
Osy saladaǵy kásiporyndardy iske qosý bir aı ishinde jumyspen qamtylǵan halyqtyń sanyn qosymsha 90 myń adamǵa ulǵaıtýǵa múmkindik beredi.
