Almatyda 20 myńnan astam ıt pen mysyqtyń kózi joıyldy
ALMATY. QazAqparat - Almatydaǵy mal qorymynda 20 myńnan astam ıt pen 300 mysyqtyń kózi joıyldy, dep habarlaıdy «QazAqparat» HAA tilshisi.
Bul týraly Almatydaǵy aýyl sharýashylyǵy jáne veterınarııa basqarmasynyń basshysy Aıdyn Kerimbek málimdedi.
«Mal qorymynda 20 707 ıt pen 335 mysyqtyń kózi joıyldy. Atalǵan sharýaǵa memleket bıýdjetinen 176,4 mln teńge bólindi»,-dedi A.Kerimbek.
Basqarma basshysynyń aıtýynsha, ótken jyly qalalyq veterınarııa qyzmeti kóshelerden 23 309 bas ıt pen 578 mysyq ustaǵan, onyń ishindegi 2 975 ıt pen 340 mysyq ıelerine qaıtaryldy.
Sonymen qatar 70 myń úı haıýanatyna chıp taǵylyp, 10 myńyna sterılızatsııa jasalǵan. Bul sharýaǵa bıýdjetten 158,4 mln teńge bólingen.
«Almatyda «PetControl» biryńǵaı elektrondy esepke alý júıesi engizildi. Osy arqyly qaladaǵy úı haıýanattarynyń esebi júrgizilip, olardyń sanyn rettep otyrýǵa bolady»,-deıdi basqarma basshysy.
Foto: koramsak.kz
