Almatyda 20-dan astam kólikti tonaǵan ekeý ustaldy

ASTANA. QazAqparat - Almaty polıtsııasy kólik tonaýmen aınalysyp kelgen eki turǵyndy ustady, – dep habarlaıdy QazAqparat Polisia.kz saıtyna silteme jasap.

Olar jasaǵan qylmystar sany 20-dan asady. 28 jastaǵy G. esimdi turǵyn men onyń qurdasy N. kólik tonady degen kúdikke ilingen.

«Jergilikti turǵyn belgisiz bireýlerdiń Volkswagen Touareg kóliginiń áınegin syndyryp, ondaǵy múlikterin urlap ketkenine shaǵymdandy. Jábirlenýshige keltirilgen shyǵyn 1,5 mln teńgeni qurady. Jedel-izdestirý is-sharalarynyń barysynda bizdiń bólimshe qyzmetkerleri urlanǵan zattardy satyp alýshylar men kúdiktilerdiń izine tústi. Olardyń aýdanymyzda 10, qalada 20-dan astam qylmys jasaǵany anyqtaldy. Ustaý kezinde urlanǵan qzattar tárkilendi», – deıdi Áýezov aýdandyq polıtsııa basqarmasynyń bastyǵy Ulan Ábilqaıyr.

Buǵan deıin eki kúdikti de bótenniń múlkin urlaǵany úshin birneshe ret sottalǵany belgili boldy. Qazirgi ýaqytta ustalǵandar qylmys jasaǵandaryn moıyndady. Olar ýaqytsha ustaý ızolıatoryna qamaldy.

Atalǵan derek boıynsha QR QK-niń 188-baby 3-bóligine sáıkes sotqa deıingi tergeý amaldary júrgizilýde.

Foto: t.me/POLICE_of_KZ