Almatyda 2 júkti áıel týberkýlezge shaldyqqan
ALMATY. QazAqparat - Almatyda bıyl 2 júkti áıel týberkýlezge shaldyqqan. Olardyń biri kesar tiligimen bosandy. Al ekinshisiniń júktiligin dárigerler toqtatýǵa bel baılap otyr, dep habarlaıdy QazAqparat tilshisi.
Bul týraly QazAqparat tilshisine qalalyq Qoǵamdyq densaýlyqty saqtaý departamenti basshysynyń orynbasary Ásel Qalyqova aıtty.
Almatyda bıyl eki júkti kelinshekten ókpe qurty aýrýyna shyqqan.
Ekeýi de indettiń juqpaly formasymen aýyrǵan.
«Eki kelinshek te júktiliktiń 12-13 aptasynda esepte turǵan. Ol kezde ekeýinen de belgiler baıqalmaǵan. Sonymen qatar, olardy rentgenge túsirý múmkin bolmaǵandyqtan, aýrý jasyryn órshı bergen. Biraz ýaqyttan soń jótel, dene qyzýynyń túspeý belgileri baıqaldy. Teksere kele ekeýinde de ókpe qurty aýrýy bary anyqtaldy. Eki áıel aýrýhanaǵa jatqyzyldy. Olardyń biri bosanyp aldy. Ekinshisiniń jaǵdaıy aýyr bolǵandyqtan, júktilikti toqtatý týraly oılanyp jatyrmyz», - dedi Ásel Qalyqova.
Mamannyń aıtýynsha, bosanǵan kelinshektiń balasy din aman deni saý týyldy.
«Bala týysymen náresteni oqshaýlap úıine jiberdik. Al anasy týberkýlez dıspanserinde áli em qabyldap jatyr. Munda naýqastar 7-8 aı emdeledi. Alaıda qazirgi damyǵan emdeý ádistemesi boıynsha adamdar aýrýhanada únemi jatpaıdy. Batstsıla shyǵýyn toqtatqan kezde adamdy ambýlatorııalyq emge úıine jiberemiz», - dedi Á. Halyqova.
Mamandardyń málimetinshe, áıel adamnyń júktiligi kezinde nemese bosanǵan soń ımmýnıteti tómendep ketedi. Stastıstıka boıynsha júktiler men bosanǵan áıelder arasynda aýtoımýndy ınfektsııanyń paıda bolýy eki ese jıileıdi. Aýtoımýndy degenimiz - juqpa eshkimnen juqpaıdy, ózinen ózi paıda bolady.
Ókpe qurty aýrýy júktiler arasynda túsik, temir jetispeýshiligi anemııasy, ottegi jetispeýshiligi, týberkýlezdik ınfektsııamen ıntoksıkatsııalaný protsesine alyp keledi.
2017 jyly Almatyda 5 júkti kelinshek, 33 bosanǵan áıel, 22 bala aýrýǵa shaldyqqan.
Al, bıyl 2 júkti áıel, 16 bosanǵan áıel, 19 bala, onyń ishinde 9 mektep jasyna jetpegen bala tirkeldi.
