Almatyda 2 jasar balany uryp-soqqan adam ustaldy
ALMATY. QazAqparat – Almatyda 2 jasar balany aıaýsyz soqqyǵa jyqqan er adam ustaldy, dep habarlaıdy QazAqparat tilshisi.
Bul aqparat áleýmettik jelide jarııalanǵan. Avtordyń aıtýynsha, bala turmystyq zorlyq-zombylyq qurbany bolǵan.
«2 jastaǵy qorǵansyz, dármensiz bala qazir №1 qalalyq aýrýhanada jatyr. 23 jastaǵy anasy Krıstına Krıajevskaıa balanyń kók ala qoıdaı sabalǵan sýretterin ákesine joldaǵan. Onyń aıtýynsha, naqsúıeri Vıktor Marks balany aıaýsyz urǵan. Eki qabyrǵasyn syndyrǵan. Balanyń týǵan ákesi polıtsııaǵa shaǵymdanýyn suraǵanda áıel balany alyp qashyp ketken»,- delingen jazbada.
Polıtsııa departamenti balany urǵan er adamnyń ustalǵanyn habarlady.
Qazir bul ispen Almaly aýdandyq PB aınalysyp jatyr.
«Balanyń kim ekendigi birden anyqtaldy. Onyń anasy bizben sóılesýge qulyqsyz boldy. 3 jasqa tolmaǵan bala qazir aýrýhanaǵa jatqyzyldy. Qosymsha sot medıtsınalyq saraptama taǵaıyndaldy. Soǵan sáıkes balanyń densaýlyǵyna keltirilgen nuqsan kólemi anyqtalady», - dedi PD.
Balany urdy degen kúdikpen 32 jastaǵy er adam ustaldy. Oǵan QR Qylmystyq kodeksiniń 110-baby 2-bólimi boıynsha jaýapkershilik qarastyrylǵan.
Qazir sotqa deıingi tergeý jalǵasyp jatyr.
Qalalyq Qoǵamdyq densaýlyq basqarmasynyń habarlaýynsha, balanyń jaǵdaıy qazir turaqty. Mıy shaıqalǵan. Alaıda, qabyrǵalary synbaǵan. Qazir neırohırýrgııa bóliminde emdelip jatyr.
