Almatyda 2 myńnan astam medıtsına qyzmetkeri koronavırýsqa qarsy vaktsına saldyrady
ALMATY. QazAqparat – Almatydaǵy №36 qalalyq emhananyń medıtsına qyzmetkerlerine «Spýtnık V» vaktsınasy egildi, dep habarlaıdy QazAqparat tilshisi.
Emhananyń bas dárigeri Gúljaınat Tilegen málim etkenindeı, Naýryzbaı aýdanynda ornalasqan tórt emhananyń 210 medıtsına qyzmetkeri vaktsına saldyrýǵa ótinish bildirgen.
«Olardyń arasynda bizdiń klınıkanyń 60 qyzmetkeri bar. Búgin bizdiń emhanaǵa 105 doza vaktsına jetkizildi. Alǵashqy 11 adamǵa vaktsına egildi. Vaktsına saldyrmas buryn barlyq qyzmetkerler dárigerdiń tekserýinen ótedi. Eger dene qyzýy 37 ° C-dan assa, vaktsınalaý keıinge qaldyrylady. Bir quty 5 adamǵa arnalǵan. Vaktsınalaýdan keıin qyzmetkerler arnaıy bólingen bólmede jarty saǵat áriptesteriniń baqylaýynda bolady. Qazir vaktsın alǵandardyń jaǵdaıdy jaqsy, janama áserler anyqtalǵan joq «, - dedi Gúljaınat Tilegen.
Almaty qalalyq qoǵamdyq densaýlyq saqtaý basqarmasynyń málimetteri boıynsha, aqpan aıynda 2050 medıtsına qyzmetkeri vaktsına saldyrady. Onyń ishinde, birinshi kezekte, juqpaly aýrýlar aýrýhanalary, jedel medıtsınalyq kómek, qarqyndy terapııa, alǵashqy medıtsınalyq-sanıtarlyq kómek, jedel járdem qyzmetkerleri, sanıtarlyq-epıdemıologııalyq qyzmettiń mamandary ımmýndaýdan ótedi.
