Almatyda 2 myńnan asa adam Keńes ókimetiniń tólqujatymen júrgen
ALMATY. QazAqparat – Almatyda 2000 asa turǵyn KSRO úlgisindegi tólqujatpen júrgen. Bul týraly onlaın brıfıng barysynda QR ІІM Kóshi-qon qyzmeti komıteti tóraǵasynyń orynbasary Sabyrjan Seıtjanov aıtty, dep habarlaıdy QazAqparat tilshisi.
Onyń sózine qaraǵanda, ishki ister organdary Qazaqstan Respýblıkasynda jaramsyz tólqujatpen ómir súrip jatqan adamdardy anyqtaý jumysyn júrgizip jatyr.
«800 adam Keńes odaǵynyń qyzyl tólqujatyn qazaqstandyq tólqujatqa aýystyryp úlgerdi. Taǵy 1700 adam byltyr qujatyn aýystyrǵan edi. Jalpy alǵanda qazaqstandyqtardyń 60%-y tólqujat aýystyrýǵa ótinish bergen. Taǵy 30% - ulttyq tólqujaty bar adamdar, 10% - azamattyǵy joq tulǵalar. Alaıda bıyl qyrkúıekten bastap saýaldyń oryndalýy 6 aıdan aspaýy tıis degen buıryqqa qol qoıyldy. Osy ýaqyt aralyǵynda saýalǵa jaýap berilmese, ishki ister organdary QR zańnamasy boıynsha qazaqstandyq tólqujatty talap etýge quqyly», - dedi Sabyrjan Seıtjanov.
Spıkerdiń aıtýynsha, azamattardyń kópshiligi zeınetaqy rásimdeıtin kezde bolmasa basqa da mańyzdy jumystar bolǵan kezde qujat aýystyrýǵa kirisedi.
«Bul máseleni keıinge qaldyrýǵa bolmaıdy. Qujat alý úshin olar kelgen jeriniń kóshi-qon qyzmetine júginse bolady. Sonymen qatar, adam quqyǵyn qorǵaý bıýrosynyń bólimshesine, «Sana Sezim» birlestiginiń keńselerine júgine alady»,- dedi ol.
Aıta ketý kerek, Qazaqstanda 6 myń adam Keńes odaǵynyń qyzyl tólqujatymen ómir súrip jatyr.
