Almatyda 2 myń jumys ornyn quraıtyn saýda ortalyǵy ashyldy
ALMATY. QazAqparat - Almatynyń Túrksib aýdanynda jalpy alańy 40 myń sharshy metrden asatyn «Mart Village» jańa saýda- fermerlik ortalyq ashylyp, nátıjesinde 2 myń jumys orny paıda boldy, dep habarlaıdy QazAqprat tilshisi.
Jańadan ashylǵan saýda nysanynda bolǵan Almaty qalasynyń ákimi Baýyrjan Baıbek bul oqıǵany órkenıetke kóshirýdiń qadamdarynyń biri dep atady.
«Almaty - saýda-sattyqtyń qalasy, barlyq kásiporyndardyń 30%-y istiń osy túrimen qamtylǵan, megapolıstiń JІÓ-niń 32%-yn saýda quraıdy, sondyqtan biz úshin kásipkerlerge jaǵdaı jasaý jáne ekinshi jaǵynan tutynýshy suranysyn yntalandyrý óte mańyzdy. Zańsyz, jabaıy saýdadan, órt qaýipsizdigi, sanıtarlyq normalar saqtalmaıtyn bazarlardan zamanaýı, jaıly saýda ortalyqtaryna kóshken jón, óıtkeni bulardaǵy árbir kásipker salyq tóleıdi», - dedi ákim.
Megapolıs basshy salyqtardyń áleýmettik mindetterdi oryndaýǵa jáne turǵyndar máselesin sheshýge múmkindik beretinin atap ótti.
«Elimizde mindetti medıtsınalyq saqtandyrý júıesi engizilýde, konvertpen aqsha alatyndar áleýmettik jaǵynan qorǵalmaǵandar, erteńgi kúni olarǵa aýrýhanalar qyzmet kórsetpeıdi, óıtkeni esh jerde tirkelmegen», -dedi ol.
Jalpy, 2015 jyldan bastap, 13 bazar jańartyldy, jyl aıaǵyna deıin taǵy da 6-y qaıta jasalady. «Mart Village» aýmaǵynda fermerlik bazarmen qosa 450 kıim, aıaqkıim, úı taýarlary, baqsha magazınderi, qurylys materıaldary, eletronıka men turmystyq tehnıka gıpermarketteri bar. Jaqyn mańda 900 oryndyq jer úst parkıngi qarastyrylǵan. Mart Village jobasyna barlyǵy 6 mlrd teńge ınvestıtsııa salynǵan. Onyń 4,52 mlrd teńgesi ekinshi deńgeıli banktiń nesıesi.
«Biz sırek kezdesetin jáne qundy taýar bolsa oryndy jalǵa tegin beremiz, sonymen qatar saýdanyń statsıonarlyq emes obektileriniń ıelerine jeńildetilgen jaǵdaıda oryndar usynamyz», - dedi jańa saýda ortalǵynyń dırektory Rýslan Erekeshov.
Eske sala keteıik, 2016 jyly Almatyda «Bıznestiń jol kartasy -2020» baǵdarlamasy aıasynda 3,2 mlrd teńge bólingen. Bólingen qarjy tolyǵymen ıgerilgen. Atalǵan baǵdarlama aıasynda 2016 jyly 306 joba maquldanyp, 198-ne demeý qarjy bólingen. 2017 jyly 31 shildedegi málimet boıynsha atalǵan membaǵdarlama boıynsha 73 joba maquldanyp, 16,98 mlrd teńge neıse berilgen.
2015 jyly atalǵan baǵdarlama boıynsha 142 joba maquldanyp, oynń 91-i 30 936 mlrd teńge kólemine nesıe alǵan. Jalpy memlekettik qoldaý 6,2 mlrd teńgege jetken. Osy jumystar aıasynda 2 419 jumys orny qurylǵan.
Túrkisib aýdany Kásipkerlik bóliminiń málimetine súıensek, 2016 jyly aýdanda ónerkásip óndirisi 6,5 paıyzdy qurap, ortasha jalaqy quny 160 myń teńge bolǵan. Aýdanda 4200 jumys istep turǵan kompanııa tirkelgen. Onyń 47-si iri jáne orta ónerkásip oryndary. Aýdanda 42 joba maquldanyp, 54 mlrd teńge bólingen. «Mart Village» memleketten nesıelik mindettemeler boıynsha paıyzdyq mólsherleme men nesıe kepildendirý boıynsha demeý qarjy alǵan.
