Almatyda 2 mıllıonnan astam adam halyq sanaǵynan ótti
«Búginde sanaq boıynsha halyqty keńinen qamtý Almaty qalasynda tirkelgen. Sanaqtan ótken turǵyndardy tirkeý boıynsha bizdiń qala óńirler arasynda birinshi orynda. 2 188 603 respondent suraldy, bul halyqtyń 109,1 paıyzy», – dedi spıker.
Ulttyq statıstıka bıýrosy saıtynyń deregi boıynsha, osy jyldyń 1 tamyzyna deıin megapolıste 2 005 496 adam turaqty tirkelgen.
Onlaın-sanaq pen saýalanamanyń aralyq qorytyndysy boıynsha ıntervıýerler qazirgi ýaqytta Almaty halqynyń sany artqanyn kórsetti.
«Sanaq el halqynyń naqty sanyn, onyń quramy men ómir súrý jaǵdaıy týraly aqparatty bilýge múmkindik beredi. Olardy taldaý nátıjesi boıynsha «halyqtyń sapasy» týraly aıtýǵa bolady. Sanaqtyń negizgi máni – ár adam eskerilýi kerek. Ómirlik sheshimder osyǵan baılanysty. Mysaly, jańa emhanalardy, mektepterdi qaıda ashý kerek, kólik ınfraqurylymy máselesi sheshiledi. Demografııalyq statıstıkany kommertsııalyq kompanııalar da paıdalanady», - deıdi Aıdar Ábildabekov.
Sonymen qatar, ol 15 qazandaǵy onlaın sanaq aıaqtalǵan sátten bastap turǵyndardan onlaın saýalnama fýnktsııasyn jańartý týraly kóptegen ótinish túse bastaǵanyn atap ótti.
Osyǵan baılanysty saıtta onlaın-rejımde 21 qazannan bastap sanaq.gov.kz platformasynyń sanaq júrgizý fýnktsııasyn jańartý týraly sheshim qabyldanǵan.
Saýalnamany burynǵydaı mamandandyrylǵan sanaq.gov.kz saıtynda toltyrýǵa bolady.
Ol e-Gov portaly jáne Aitu mobıldi qosymshasy arqyly avtorızatsııalandy. Onlaın ótý fýnktsııasy halyq sanaǵynyń sońyna deıin qoljetimdi bolady.
«Qala 327 nusqaýshy jáne 2 287 eseptik ýchaskege bólingen. Árbir esep ýchaskesi bir ıntervıýerge bekitilgen. Turǵyndardy tek onlaın-sanaqpen qamtý boıynsha M. Áýezov aýdany kósh bastap tur – 41,79%. Al, Bostandyq aýdanynda onlaın-sanaqpen qamtý deńgeıi óte tómen – 24,09%. Ekinshi format – oflaın-sanaq boıynsha óz aýdandarynyń 80%-dan astamyn qamtyǵan Naýryzbaı, Jetisý, Alataý, Túrksib aýdandary kósh bastap tur», - dedi ol.
Ulttyq statıstıka bıýrosynyń Almaty qalasy boıynsha departamentiniń basshysy qala turǵyndaryna belsendilik tanytqandary úshin alǵys aıtyp, sanaqtan ótpegen adamdardy onjyldyqtyń asa mańyzdy is-sharasyna qatysýǵa shaqyrdy.
«Eger úıińizge sanaq júrgizýshi kele almasa, onda siz onlaın formatta sanaqtan óte alasyz nemese «1446» Call-ortalyǵyna qońyraý shalyp, ózińizge ıntervıýerdi shaqyra alasyz. Halyq sanaǵynda ár adam qamtylsa, sátti ótti dep sanalady. Bul bizdiń elimizdiń búkil halqyn qamtyǵanymyzdy bildiredi», - dedi Aıdar Ábildabekov.
