Almatyda 2 qurǵaq sýburqaq paıda bolady
ALMATY. QazAqparat - Almaty kóshelerin rekonstrýktsııalaý barysynda «Astana» alańynda 2 qurǵaq sýburqaq paıda bolady, dep habarlaıdy QazAqparat tilshisi.
Qalalyq ákimdiktiń baspasóz qyzmeti taratqan aqparatqa sáıkes, búgin Almaty ákimi jaıaý júrginshilerge basymdyq beretin birqatar kóshelerdi qaıta jasaý jumystaryn tekserip shyqty.
Baýyrjan Baıbek kezekti jumys sapary aıasynda Panfılov, Jibek joly, Gogol, Qabanbaı batyr kósheleri men «Astana» alańyn qaıta jasaý barysyn qadaǵalady.
Qaıta jasalǵan kóshe aýmaqtaryna kespe tastar tóselip, jasyl jelek otyrǵyzylady. Kishi sáýlet formalar, sport ınventarlary qoıylyp, balalar alańdary jasalady.
Qurylys jumystary barysynda jasyl-jelek qyrqylmaıtyn boldy.
Tar keńistikti keńeıtý maqsatynda bıik aǵashtar, qaıyń, emen, myńnan astam buta-shilik otyrǵyzý qarastyrylǵan.
«Mysaly, «Astana» alańynda kólik qozǵalysy jolaǵy qysqarady. Bosaǵan keńistikterge qosymsha aǵashtar otyrǵyzylady. Eki qurǵaq sýburqaq paıda bolady. Osylaısha, jaıaý júrginshiler men kólik legi ekige bólinedi, avtoturaq aımaǵy shekteledi. Alańnyń soltústik bóligine granıt tastar tóseledi», - delingen habarlamada.
Jumys qyrkúıek aıynda aıaqtalady.
Panfılov kóshesi Qabanbaı batyr kóshesinen Jibek joly joly kóshesine deıin tek jaıaý júrginshige arnalady. Ońtústikten soltústikke qaraı birjaqty kólik qozǵalysy jáne arnaıy kólikter (jedel járdem, órt sóndirýshi) jolaǵy bolýy múmkin. ıAǵnı, Arbat pen Abaı atyndaǵy opera jáne balet teatry aldyndaǵy skverler jasyl dálizder arqyly jalǵasady.
Atap óterlik jaıt, kóshelerdi qaıta jasaý jumystary barysynda kóne qalanyń kespe tastary tabylǵan. Almaty ákimi arhıtektorlar men merdigerlik uıymdarǵa kóne tastardy saqtaýdy, olardyń keıbirin Panfılov kóshesi boıyndaǵy jaıa júrginshi jolyna tóseýdi tapsyrdy. «Osynyń barlyǵy saqtalýǵa tıis, bular bizdiń súıikti qalamyzdyń tarıhy» - dedi Baýyrjan Baıbek.
Gogol kóshesi ýchaskesinde jeke kólikter qozǵalysyn eki jaqqa da birdeı tek bir jolaq arqyly júrgizý qarastyrylǵan. Tek arnaıy qýystarda ǵana kólikti qaldyrýǵa bolady. Qoǵamdyq kólikke jolaq bólinetin bolady. Keńeıtilgen jaıaý júrginshi aımaǵyna betondy plıtkalardan trotýarlar jasalady.
Almaty ákimi jumys sapary barysynda Rysqulov dańǵyly men Qulja trakty boıyndaǵy jol aıryǵynyń qurylysyn da tekserdi. «Jas otaý» neke saraıynyń qaıta jasalýyn baqylap, qalada salynyp jatqan «Naýaı», «Bastaý», «Glorııa», «Miras Park»,«Dostyk Residence» syndy birqatar turǵyn keshenderinde boldy.
Atap óterlik jaıt, tek sońǵy eki nysanda ǵana 80 otandyq kompanııa men 6 myńnan astam adam jumys isteýde. Mundaǵy qazaqstandyq qamtý úlesi 70 paıyzdan asady.
