Almatyda 2 kásiporyn jalaqyny saqtaı otyryp, qyzmetkerlerin demalysqa jiberdi
ALMATY. QazAqparat – Almatyda Indýstrıaldy aımaǵynda jumys isteıtin eki iri kásiporyn jumyskerlerin karantın aıaqtalǵansha demalysqa jiberdi. Jumys berýshi olardyń jalaqysy men jumys ornyn saqtap qalmaq. Bul týraly QazAqparat tilshisi «Almaty Indýstrıaldy aımaǵynyń» baspasóz qyzmetine silteme jasap habarlaıdy.
«TOKYO ROPE ALMATY» JShS men «ASIA STEEL PIPE COMPANY» JShS jumyskerlerin ýaqytsha demalysqa jiberýdi uıǵardy. Kompanııa basshylyǵy karantın ýaqyty bitkenshe ıaǵnı 16 sáýirge deıin olardyń jalaqysy men jumys orny saqtalady.
«Óndiristiń jabyq bolǵany, álbette bizge shyǵyn ákeledi. Biraq, jumyskerlerdiń densaýlyǵy ekonomıkalyq múddeden qymbat», - dedi kompanııa basshylyǵy.
