Almatyda 2 bala terezeden qulap ketken
ALMATY. QazAqparat - Almatyda jyl basynan beri 2 bala terezeden qulaǵan. Bul týraly onlaın brıfıng barysynda qalalyq TJD azamattyq qorǵanys basqarmasynyń basshysy, polkovnık Turysbek Sartaev aıtty, dep habarlaıdy QazAqparat tilshisi.
«Jyl saıyn jaz maýsymynda statıstıka qaıǵyly oqıǵamen bastalady. Sebebi, balalar bıik qabattardaǵy ashyq turǵan terezeden qulap ketedi. Naýryz aıynan bastap Almaty qalasynda 112 jelisi boıynsha osyndaı 2 oqıǵa tirkeldi, bir bala oqıǵa ornynda mert boldy. Jumalıev kóshesinde ornalasqan 5 qabatty úıdiń 4-qabatynyń terezesinen 3 jastaǵy ul bala qulap ketken. Ol kezde ata-anasy úıde bolǵan. Aýyr jaraqat alǵan bala shuǵyl kómek kórsetý ortalyǵyna jetkizildi. Dárigerlerdiń kómeginiń arqasynda 10 kúnnen soń bala jazylyp, aýrýhanadan shyqty», - dedi Turysbek Sartaev.
Al Jasqanat shaǵynaýdanynda 9 qabatty úıdiń 6-qabatynan qulaǵan bala oqıǵa ornynda kóz jumdy.
«22 naýryz mereke kúni Túrksib aýdany Jas Qanat yqsham aýdanyndaǵy 9 qabatty úıdiń 6-qabatynan úlkenderdiń qaraýynsyz as úıde oınap otyrǵan qyz bala terezeden qulap tústi. 18 maýsymda 4 jasqa tolar edi. Bala jedel medıtsınalyq járdem kelgenge deıin qaıtys boldy»,- dedi polkovnık.
TJD ókili aınalaǵa qyzyǵýshylyǵy basym 5 jasqa deıingi balalardyń jıi qulaıtynyn aıtty.
Osy jaǵdaılarǵa baılanysty Almaty TJD ata-analar mynadaı erejelerdi este saqtaýy kerektigin aıtady:
- eger tereze 12,5 sm artyq ashyq bolsa, balańyz terezeden qulap ketýi múmkin;
- terezeniń keń ashylýyna múmkindik bermeıtin qulyp ornatyńyz;
- balalarǵa terezeden alys oınaýdy úıretińiz;
- balalardy únemi baqylaýda ustaý kerek;
- terezege ornatylǵan moskıtti torlar balalardyń qulaýyna kedergi bola almaıdy;
- terezeni ashýǵa múmkindik bermeıtin shekteýler qoıyńyz.
