Almatyda 2 aıdyń ishinde taǵy bir ınfektsııalyq gospıtal salyndy
ALMATY. QazAqparat - Almaty ákimi Baqytjan Saǵyntaev eki aıdyń ishinde salynǵan ekinshi modýldi ınfektsııalyq gospıtaldi aralap kórdi, dep habarlaıdy QazAqparat tilshisi.
Gospıtaldiń 30 jansaqtaý palatasynda 300 tósek-oryn bar. Barlyq tósekter medıtsınalyq gazben jabdyqtalǵan.
Mundaǵy naýqastardyń jaǵdaıy «aqyldy» gospıtaldyń avtomattandyrylǵan júıesi arqyly naqtyly ýaqyt rejıminde táýlik boıyna qadaǵalanady. Baǵdarlama qalanyń medıtsınalyq aqparattyq júıesimen jáne PACS-daǵy barlyq rentgendik, KT jáne MRT sýretterindegi málimetterdiń tsıfrlyq bazasymen biriktirilgen.
Klınıka zamanaýı KT, rentgen, ÝZI apparattarymen jabdyqtalǵan jáne jeke qýatty zerthana da bar, munda saraptamanyń barlyq túrleri, onyń ishinde KVI-diń PTR dıagnostıkasy da jasalady.
Gospıtal qaýipsizdiginiń joǵary ekologııalyq klasy aýany tazartý júıesin, onyń ishinde jaýyn sýyn da zalalsyzdandyrýdy, medıtsınalyq qaldyqtardy ýtılızatsııalaýdy qamtamasyz etedi.
Almaty ákimi Baqytjan Saǵyntaev dárigerlerdiń oıdaǵydaı jumys jasaýlary úshin qalanyń barlyq jaǵdaılardy jasaıtynyn atap ótti.
«Tórt aıdyń ishinde biz eń zamanaýı qurylǵylarmen jabdyqtalǵan úsh aýrýhana saldyq. Bulardyń barlyǵy qala turǵyndarynyń ıgiligi úshin qoldanylýda», - dedi B. Saǵyntaev.
Sonymen qatar, ortalyqty abattandyrý kezinde 2 ga aýmaq kógaldandyryldy. Gazon jasalyp, qylqan japyraqty aǵashtar otyrǵyzyldy. B. Saǵyntaev Jasyl Almaty baǵdarlamasy aıasynda qosymsha aǵash kóshetterin otyrǵyzýdy tapsyrdy.
Buǵan deıin, Almatynyń Túrksib aýdanynda 500 oryndy ınfektsııalyq klınıkanyń ashylǵandyǵy týraly habarlanǵan edi.
Sonymen qatar, taıaý ýaqytta 200 oryndy jeke kovıdti gospıtaldder ashylady, osylaısha jańa modýldi gospıtaldi eskere otyryp, megapolıste KVI naýqastaryn emdeýge arnalǵan 1 myń jańa tósek-oryn paıda bolady. 32 statsıonardyń jalpy qýattylyǵy 7226 oryndy quraıdy.
Aıta ketsek, Almatynyń densaýlyq saqtaý júıesin modernızatsııalaýdyń úsh jyldyq baǵdarlamasy aıasynda medıtsına uıymdarynyń materıaldyq- tehnıkalyq bazalary kúsheıtilýde. Máselen, jyl basynan beri qaraı 52 ÝZI apparaty, 38 rentgen, 269 ÓJJ apparaty, 5 KT, 2 MRT apparaty satyp alyndy. Sonymen qatar, 1300 kópsalaly medıtsınalyq tósek, 250 tósek janyndaǵy monıtor, zerthanalyq qurylǵynyń 43 birligi, 1050 ottegi kontsentratory alyndy.
Bulardan ózge, jedel járdem qyzmetiniń avtoparki 35 avtomashınaǵa jańardy, jyl sońyna deıin taǵy 100 jedel járdem kóligi alynatyn bolady. Birinshi eshelondaǵy segiz statsıonarǵa medıtsınalyq gazdyń 24 myń tósek-oryndyq ortalyqtandyrylǵan júıesi ornatylýda. 17 statsıonarda aǵyn sýdy zararsyzdandyrý, al 13-de medqaldyqtardy ýtılızatsııalaý júıeleri salynýda.
