Almatyda 2 240 tekshe metr qar shyǵaryldy
ALMATY. QazAqparat – Almatyny qalyń qar basty. Qaladan 2 240 tekshe metr qar shyǵaryldy, dep habarlaıdy QazAqparat tilshisi.
Almatyǵa 3-4 qarasha kúnderi toqtaýsyz qar jaýdy. Qaladaǵy qardyń qalyndyǵy 8 sm. Taý bókterindegi aýdandarda – 10 sm, taýly aýdandarda 15 sm-ge deıin jetti.
Kóktaıǵaqtyń aldyn alý úshin qar jaýǵan kezden bastap joldarǵa, qıylystarǵa, jolaıryqtarynyń kireberisterine, taý bókterine jáne taýly aımaqtarǵa kóktaıǵaqtarǵa qarsy materıaldar sebildi.
«4 qarashadan 5 qarashaǵa qaraǵan túni qar tazalaý jumystaryna 37 qar tıegish, 36 samosval, 9 avtogreıder jáne 236 jol jumysshysy tartyldy. Syrtqa barlyǵy 2240 tekshe metr qar shyǵaryldy»,- delingen ákimdik taratqan habarlamada.
Aýdandyq ákimdikter men qala ákimdiginde qar tazalaý jumystaryn táýlik boıy baqylaıtyn kezekshilik uıymdastyryldy.
Aldaǵy eki kúnde aýa temperatýrasynyń tómendeýiniń boljanýyna oraı jyly kıiný, júrgizýshiler men jaıaý júrginshiler kóktaıǵaqtyń paıda bolýyna baılanysty saqtyq sharalaryn saqtaýlary qajet.
