Almatyda 19 jastaǵy stýdent qyzdyń denesi taýdan tabyldy
ALMATY. QazAqparat - Almatyda 19 jastaǵy stýdent qyzdyń denesi taýdan tabyldy, dep habarlaıdy QazAqparat tilshisi.
Almatyda ornalasqan Abylaı han atyndaǵy Qazaq halyqaralyq qatynastar jáne álem tilderi ýnıversıtetiniń stýdenti Darııa beısenbi kúni úıinen shyǵyp, ýnıversıtet jaqqa asyǵyp ketken.
Juma kúni onyń denesi taý jaqtan tabyldy. Bul týraly otbasynyń jaqyny Meıramgúl Isataı Feısbýkte jazdy.
«Aýyr qaıǵy. Nebári 19 jasta. Armanshyl edi, aǵylshyn tiliniń mamany bolǵysy keletin. Beısenbi kúni tańerteń Almaty qalasyndaǵy úıinen ýnıverdegi sabaǵyna asyǵyp ketken. Biraq sabaqqa barmapty. Jansyz denesi keshe taý jaqtan tabyldy. Jaýqazyndaı jaınaǵan Darııanyń ólimine kinəli qara nıettiler de anyqtalar. Allam tek anasy Gúlbarshynǵa úlken sabyr berip, o dúnıege ketken Darııany aldynan jarylqasyn!», - dep jazdy Meıramgúl Isataı.
Marqumnyń jaqyndary onyń kisi qolynan qaza tapqanyn aıtady. Al Almaty qalalyq ІІD boıjetken sýıtsıdke barǵan degen aldyn ala boljam jasap otyr.
«Aldyn ala málimet boıynsha, qyz bala ózine qol salǵan. Qazir tergeý jumystary júrip jatyr», - dedi ІІD resmı ókili Saltanat Ázirbek.
