Almatyda 18 jasqa tolmaǵan stýdentter vaktsına pasportyn ala bastady

ALMATY. QazAqparat – 18 jasqa tolmaǵan almatylyqtar vaktsınatsııa pasportyn ala bastady. Bul týraly óńirlik kommýnıkatsııalar qyzmetinde ótken baspasóz máslıhatynda S. Asfendııarov atyndaǵy QazUMÝ jastar saıasaty basqarmasynyń basshysy Elnur Asqarov málim etti, dep habarlaıdy QazAqparat tilshisi.

Elnur Asqarovtyń aıtýynsha, búginde Almatyda 12-17 jastaǵy 1 700-ge jýyq jasóspirim vaktsınanyń birinshi komponentin aldy jáne endi vaktsınatsııanyń elektrondy pasportyn eGov-mobile mobıldi qosymshasynan júkteı alady.

JOO-nyń jastar saıasaty basqarmasynyń basshysy stýdentterdiń ishinde 1 599 kámeletke tolmaǵan jasóspirim bar ekenin atap ótti.

«Vaktsınatsııanyń arqasynda jańa oqý jyly dástúrli formatta bastaldy. Eger biz sanıtarlyq-epıdemıologııalyq erejelerdi saqtaýdy jalǵastyratyn bolsaq, jasóspirimder vaktsına alsa, bizdiń qala men elimiz epıdemıologııalyq jaǵdaıdyń nasharlaýynan qutyla alady», - deıdi ol.

Sonymen qatar, spıker almatylyq stýdentter vaktsınatsııa naýqanynda belsendilik tanytyp jatqanyn tilge tıek etti.

«Bizde AMSK klınıkasy bar. Keshe biz 18 jasqa tolmaǵan vaktsınalanbaǵan stýdentterdiń tizimin, ata-analardyń ruqsatyn jınadyq jáne ekpe jasaı bastadyq», - dedi Elnur Asqarov.