Almatyda 18 mamyrdan bastap qandaı uıymdar jumys isteıdi
ALMATY. QazAqparat - Almatyda 18 mamyrdan bastap týroperatorlar, uıaly baılanystyń abonenttik bólimsheleri, ekinshi deńgeıli bankter jáne qarjy sektorynyń basqa da uıymdarynyń qyzmetinen shekteýler alynyp tastalady, dep habarlaıdy QazAqparat tilshisi.
Qalalyq ákimdiktiń habarlaýynsha, bul taǵy 34,2 myń adamdy jumyspen qamtýǵa múmkindik beredi.
Degenmen, qalada karantındik sharalar áli de jalǵasýda.
«Týroperatorlardyń, uıaly baılanystyń abonenttik bólimsheleriniń jáne qarjy sektory kompanııalarynyń jumysy kelesi algorıtm boıynsha júzege asady: Eń aldymen, Almaty qalasynyń Bas memlekettik sanıtarlyq dárigeriniń qaýlysynyń erejelerimen tanysý kerek. Sosyn mindetti áleýmettik qashyqtyq, jumys oryndaryndaǵy qatań sanıtarlyq rejım sııaqty ereje talaptaryna sáıkes nysandy daıyndaýǵa mindetteledi. Daıyndyq jumystary sátti aıaqtalǵannan keıin infoalmaty.kz saıtynda tirkelip, nysannyń erejelerdiń talaptaryna sáıkes daıyndalǵanyn rastap, elektrondy tsıfrlyq qoltańbamen habarlamaǵa qol qoıý arqyly kásiporynda jazylǵan normalardyń saqtalýyna kepildik beredi. Tikeleı jumys ornynda qajet qyzmetkerler sanyn osy uıymdardyń jetekshileri derbes anyqtaıdy», - dedi qalalyq Kásipkerlik jáne ınvestıtsııalar basqarmasynan.
Esterińizge sala ketsek, buǵan deıin Almatyda aýdıt ótken jaǵdaıda jeke turǵan sulýlyq salondary men bilim berý ortalyqtary, ónerkásip jáne qurylys salasyndaǵy obektiler, jobalaý uıymdary, sondaı-aq úıge jetkizý qyzmeti, TJO, shınomontaj, kólik jýý jáne avtosalondar, uıymdastyrý tehnıkasyn jóndeý jáne jarnama agenttikteri jumysynan shekteý alynyp tastalǵan bolatyn.
Kólik jáne qoıma, Aqparat jáne baılanys, qarjy qyzmetteri (50% - ekinshi deńgeıli bankter, mıkroqarjy uıymdary, saqtandyrý kompanııalary, brokerler, lombardtar, aıyrbastaý pýnktteri), bızneske arnalǵan kásibı qyzmetter, fotosalondar men gúl pavılondary, shashtarazdar, jyljymaıtyn múlik boıynsha jasalatyn operatsııalar jónindegi kompanııalar, baspa qyzmeti, aıaq kıim jóndeý jáne hımııalyq tazalaý, kir jýý, 500 sharshy metrge deıin azyq-túliktik emes dúkender aýdıtsiz, sanıtarlyq-epıdemıologııalyq talaptardy oryndap qana jumysyn bastap ketken bolatyn.
