Almatyda 1715 adam vaktsına saldyrdy
ALMATY. QazAqparat - Almaty qalalyq qoǵamdyq densaýlyq saqtaý basqarmasy basshysynyń orynbasary Laýra Myrzaǵalı megapolıste «Spýtnık V» vaktsınasynyń birinshi kezeńi boıynsha ekpe salý aıaqtalǵanyn málim etti, dep habarlaıdy QazAqparat tilshisi.
«Búgin, 19 aqpanda 0,5 ml dozada birinshi komponenti bar vaktsınany salý kezeńi aıaqtalady. Osy ýaqytqa deıin 1715 adamǵa ekpe salyndy, búgingi jumys kúniniń sońyna deıin qalǵandary alady.Vaktsına alý boıynsha 55 adamnyń jaǵdaıyna qaraı keıinge qaldyrylsa, 3 adam ekpe alýdan bas tartty», - dedi ol.
Onyń aıtýynsha Qazaqstanda vaktsına salý erkin túrde júrgiziledi, eger adam daıyn bolmasa, ol saldyrmaıdy.
«Keıbir qyzmetkerlerde vaktsınaǵa keri áser boldy. Negizinen mundaı belgiler bir-eki kúnde tarqaıdy. Vaktsına adam aǵzasyna engen soń ımmýnıtet qalyptastyryp, aǵzanyń syrtqy ınfektsııaǵa qarsy turýyn oıatady. Vaktsına alǵandarda kóbinde bas aýrýy, dene qyzýy boldy», - deıdi Laýra Myrzaǵalı.
Jalpy «SQ-Farmatsııa» Almaty qalasyna vaktsınanyń birinshi kezeńi boıynsha 1750 dozasyn jetkizdi. Eń aldymen vaktsına ınfektsııalyq statsıonarlarǵa, kópbeıindi aýrýhanalardyń qabyldaý bólimshelerine, jedel medıtsınalyq járdem qyzmetkerlerine, reanımatsııa bólimshesi men bastapqy medıtsınalyq sanıtarııalyq kómek kórsetý uıymdaryna, sondaı-aq sanıtarly-epıdemıalogııalyq qyzmettiń medıtsına qyzmetkerlerine salyndy.
Sonymen qatar, ol kelesi aptadan bastap revaktsına salý bastalatynyn jetkizdi. Ekinshi vaktsınany salǵan soń adam 30 mınýttaı medıtsına qyzmetkerleriniń baqylaýynda bolady. Kelesi kúni ol kisige qońyraý shalyp, onyń jaǵdaıyn tekseredi.
