Almatyda 1700 balaǵa arnalǵan qala ákiminiń jańa jyldyq shyrshasy ótip jatyr
ATY. 25 jeltoqsan. QazAqparat - Búgin Almatydaǵy memlekettik tsırkte 1700 oqýshyǵa arnalǵan Almaty qalasy ákiminiń jańa jyldyq merekelik shyrshasy ótti.
Merekelik sharany qala ákimi Ahmetjan Esimov óziniń quttyqtaý sózimen ashyp, ótip bara jatqan 2010 jylda atqarylǵan mańyzdy isterdi atap ótti. "Daǵdarysqa qaramastan elimizdiń ekonomıkasy damydy. Al, ekonomıkanyń damýy kóptegen áleýmettik máselelerdi sheshýge jol ashty. Almatynyń ózinde 20-dan astam balabaqsha, mektep, densaýlyq, sport nysandary salyndy. Munyń barlyǵy bizdiń qoǵam ósip-ónsin, órkenıetti bolsyn, tanylǵan eń kúshti memleketterdiń arasyna qosylsyn degen Elbasymyz N.Á. Nazarbaevtyń tapsyrmasy aıasynda atqaryldy", - deıdi A.Esimov. Sonymen qatar ol ótip bara jatqan 2010 jylǵa rahmetimizdi aıtyp, kele jatqan 2011 jyldy jaqsy qarsy alý maqsatynda kóptegen sharalar ótkizilip jatqandyǵyn jáne onyń biri búgingi jańa jyldyq shyrsha ekendigin jetkizdi. "Munyń barlyǵy keleshekte jastar jaqsy oqyp, salaýatty ómir saltyn qalyptastyryp, Otanymyzdy súıetin, naǵyz myqty azamat bolyp shyǵý úshin jasalyp otyr", - dep atap ótti óz sózinde Ahmetjan Smaǵululy.
A.Esimov sondaı-aq alda kele jatqan 7-Qysqy Azııa oıyndaryn ótkizýge qalamyz daıyn ekendigin aıtyp, Almatyda kóptegen sporttyq nysandardyń salynǵandyǵyn jetkizdi. "Qysqy Azııa oıyndary bar bolǵany 7 kún ǵana bolady. Sondyqtan jańadan salynǵan sporttyq keshender qalamyzdyń turǵyndarynyń ıgiligi úshin salyndy", - deıdi qala ákimi.
Merekelik sharaǵa qala mektepterindegi úzdik oqýshylar men ata-anasyz qalǵan balalar qatysty. Oqýshylar shara barysynda tsırk artisteriniń kontserttik baǵdarlamalaryn tamashalap qana qoımaı, óz ónerlerin de pash etti.
