Almatyda 17 jastaǵy aıaqdoshylar arasynda QR Prezıdenti kýbogy úshin halyqaralyq týrnır ótedi
ALMATY. 21 sáýir. QazAqparat - Almatyda 28 sáýir men 2 mamyr aralyǵynda fýtboldan 1996 jyly týǵan bozbalalar arasynda QR Prezeıdenti kýbogy úshin 5-halyqaralyq týrnır bolady.
Dástúrli túrde jyl saıyny ótetin bul jarysty QR Fýtbol federatsııasy men «Nur Otan» HDP uıymdastyryp otyr. Oǵan bul joly 8 eldiń quramasy qatyspaq. Jarys qojaıyndary jerebe boıynsha Vengrııa, Túrikmenstan jáne Armenııa fýtbolshylarymen «A» tobynda óner kórsetedi. Al Túrkııa, Ázirbaıjan, Iran men Grýzııa komandalary «B» tobyna toptasyp otyr.
Týrnır Túrkııa men Iran quramalary arasyndaǵy oıynmen bastalady. Jarystyń alǵashqy kúni qazaqstandyqtar túrikmendermen, kelesi kúni majarlarmen, al irikteý synynyń aqtyq oıynyn 1 mamyrda armıan aıaqdopshylarmen ótkizedi. Toptyq synda úzdik shyqqandar 3 mamyrda júldeli oryndardy, al ózgeleri 4-8 oryndardy sarapqa salatyn bolady.
