Almatyda 17 jalǵan dıplom men attestat anyqtaldy
ALMATY. QazAqparat - Almatyda bilim alǵany týraly dıplomdar men olardyń qosymshalarynyń, attestattardyń, barlyǵy 17 qujattyń túpnusqalyǵy rastalmady. Ony adamdar shetelge shyǵar kezde bilgen.
Bul týraly Almaty qalalyq Bilim salasyndaǵy baqylaý departamenti Óńirlik kommýnıkatsııalar qyzmetinde aıtty, dep habarlaıdy QazAqparat tilshisi.
Departament basshysy Gúlnar Ermekbaevanyń sózine qaraǵanda, qujattardy apostıldeý barysynda 17 qujattyń jalǵandyǵy anyqtaldy.
"Bizge shetelge shyǵatyn azamattar qujattaryn apostıldeýge, naqtylaýǵa 17 qujat ótkizdi. Olar dıplomdaryn, attestattaryn, kandıdattyq jáne doktorlyq dıssertatsııalaryn teksertti. Onyń ishinde 17 qujattyń túpnusqasy tabylmady. Byltyr 12 qujat bolsa, bıyl 5 qujat. Olardyń barlyǵy Іshki ister departamentine joldandy",- dedi Gúlnar Ermekbaeva.
Bilim sapasyn syrttaı baqylaý bóliminiń basshysy Saparov Ǵaınattyń aıtýynsha, olardyń arasynda birqatar JOO bar.
"Bul qujattar túrli sebeptermen rastalmaýy múmkin. Adamdar 1999-2000 jyldar arasynda dıplom satyp alǵan. Onyń barlyǵyna JOO aıypty emes, kósheden satyp alýy da múmkin. Atap aıtqanda, Sport jáne týrızm akademııasy, ál-Farabı atyndaǵy QazUÝ, Almaty halyq sharýashylyǵy ınstıtýty, lıngvıstıkalyq gımnazııa qujattary rastalǵan joq. Bálkim kóp qujat arhıvte joıylyp ketti me, álde oqý oryndary jabylyp qaldy ma, sony da eskerý kerek", - dedi Ǵaınat Saparov.
Departament basshysy Gúlnar Ermekbaeva departament jumystarynyń basym baǵyttary, bilim berý qyzmet sapasyn arttyrý, lıtsenzııalaý máseleleri, mekteptiń bilim berý saıasatyn baqylaý týraly aıtty.
