Almatyda 17 myń adam turaqty jumysqa ornalasty

ALMATY. QazAqparat –Almatynyń jumyspen qamtý ortalyǵyna jyl basynan beri 36 myńnan astam adam júgingen. Bul týraly brıfıng barysynda Almaty qalasy áleýmettik ál-aýqat basqarmasy basshysynyń orynbasary Danııar Álkebaıuly aıtty, dep habarlaıdy QazAqparat tilshisi.

«Jumyspen qamtýdyń jol kartasy» baǵdarlamasynyń arqasynda Almatyda 22 myńnan astam adam jumyspen qamtyldy. Onyń ishinde 17 myń adam turaqty jumysqa ornalasty. Al 5 myń turǵyn ýaqytsha jumysqa kirdi. Jospar boıynsha biz 26 myńdaı jańa jumys ornyn ashamyz. Bul - negizinen qurylys salasynyń mamandary. Bizde kafel jabystyratyn, dánekerleýshi sııaqty mamandyqtarǵa suranys joǵary»,– deıdi Danııar Álkebaıuly .

Sonymen qatar, ol qalada «Eńbek» baǵdarlamasy júzege asyrylyp jatqanyn tilge tıek etti.

«Eńbek» baǵdarlamasy boıynsha jumys berýshiler ýaqytsha jumys oryndaryn uıymdastyrady. Ol úshin bıýdjetten qarajat qarastyrylǵan. Bul - qoǵamdyq jumystar, áleýmettik jumys oryndary jáne jastar praktıkasy. Qoǵamdyq jumysqa qatysatyn adamdardyń eńbegine aqy tóleýdi halyqty jumyspen qamtý ortalyǵy aı saıyn jumys berýshiler usynǵan málimetter negizinde júrgizedi. Eń tómengi jalaqy - 85 000 teńge. Sondaı-aq, tehnıkalyq jáne kásiptik oqý bar. Ol jerde 9-11 synypty bitirgen túlekter, joǵary oqý ornyna túse almaǵan jastar bilim ala alady. Qazir qujat qabyldaý júrip jatyr»,-deıdi ol.