Almatyda 17 konfessııanyń 180 dinı birlestigi tirkelgen
Qalalyq Qoǵamdyq damý basqarmasynan málim etkendeı, Almatyda 17 konfessııanyń 180 dinı birlestigi jumys istep tur. 113 dinı nysan onyń ishinde 50 meshit, 19 pravoslav shirkeýi, 2 katolık shirkeýi, 1 sınagoga, sondaı-aq Von-býdda konfessııasynyń - 1, protestant konfessııasynyń – 34, Iegova kýágerleriniń – 4 jáne Bahaı qoǵamynyń 1 ǵımaraty bar.
Desek te, qalada dinı nanym senimi qalyptasqan adamdardyń basym kópshiligi musylmandar men pravoslavty hrıstıandar bolyp tabylady.
Almatydaǵy meshitterge kúnine 70 myń adam keledi, pravoslav shirkeýlerinde 20 myń adam ǵıbadat jasaıdy. Katolık shirkeýine - 500 adam, sınagogalarǵa - 200 adam, býdda hramyna 100 adamǵa jýyq keledi.
Qalada 4 dinı oqý orny resmı jumys istep tur: «Nur Múbárak» Mysyr ıslam mádenıeti ýnıversıteti, QMDB janyndaǵy ımamdardyń biliktiligin arttyrý ınstıtýty, «Abý-Hanıfa» kolledj-medressesi, Almaty pravoslav shirkeýiniń dinı semınarııasy tirkelgen.
Búginde Alataý, Bostandyq, Naýryzbaı, Túrksib aýdandarynda bir-bir meeshitten boı kóterdi. Atalmysh din úılerine barlyǵy 10,3 myń adam sııady dep josparlanǵan.
Almaty meshitterinde 208 myń adam qyzmet etedi. Qalada 8 namazhana ashylǵan.
Pravoslav shirkeýine kelýshilerdiń sany Rojdestvo men Pasha kezinde artady. Al ádette pravoslav shirkeýlerine hrıstıandardyń 30 paıyzy ǵana keledi.
Oǵan qaramastan Túrksib, Jetisý, Bostandyq aýdandarynda 3 pravoslav shirkeýiniń qurylysy bastalmaq.
Rım Katolık shirkeýiniń kelýshileri Rojdestvo men Pashada 400 adamǵa jetedi.
Búginde qalaǵa álemniń 21 elinen mıssıonerler kelgen.
«Zaıyrly memleket qaǵıdalaryna sáıkes dinı konfessııalardyń kóptigine qaramastan Almatyda dinı ahýal turaqty. Bul salany qala bıligi baqylaýda ustap otyr», - dedi qalalyq Azamattyq damý basqarmasynyń bas mamany Samat Qabylbekov.
