Almatyda 17-den astam páterdi úptegen úı tonaýshy ustaldy
ALMATY. Tamyzdyń 18-i. QazAqparat /Názıra Eleýhan/- Almatyda 17-den astam páterdi úptegen úı tonaýshy ustaldy. Páter tonaýmen aınalysyp júrgen 18 jastaǵy Vadım esimdi jas jigit bolyp shyqty,
dep habarlaıdy QazAqparat.
Osydan jarty jyl buryn ol Áýezov aýdanynda 40 páterdi tonaǵandyǵy úshin sottalyp shyqqan eken. Serııalyq qylmysker atanǵan ol, jarty jyldyń ishinde «Aınabulaq», «Qulager» yqsham aýdandarynda 17 páterdi tonap úlgergen.
«Biz ony 3-shi Aınabulaqtan kezekti úı tonap kele jatqan jerinen, aıǵaqty zattarymen ustadyq. Ol tek kúndiz, úı ıeleri jumysta bolǵan ýaqytta tonaǵan. Asa saqtyq saqtaı otyryp, ol páterdiń terezesine tas laqtyryp, esigine qońyraý soǵyp tekserip alyp, jumysyna kirisken. Páterlerden tek altyn buıymdar men aqsha izdegen. Esikti arnaıy buzatyn quralmen emes, kóbine qulyptyń ortasyn buzyp ashqan. Óziniń aıtýynsha, birde-bir kórshi bóten adamnyń júrisine mán bermegen», dedi Jetisý aýdanynyń ІІD Basqaramasynyń bastyǵy, polıtsııa podpolkovnıgi Qanat Taımerdenov.
