Almatyda 16386 kópbalaly otbasy jańa memlekettik járdemaqy alady

ALMATY. QazAqparat – Almatyda 16386 otbasy memlekettik járdemaqy alady, bul týraly Eńbek, áleýmettik qorǵaý jáne kóshi-qon komıtetiniń Almaty qalasy boıynsha departamentiniń bastyǵy Aıdynjan Narmatov aıtty, dep habarlaıdy QazAqparat tilshisi.

«Almatyda 16386 kópbalaly otbasy memlekettik járdemaqy alady. Búgingi kúnge deıin 9000-nan astam otbasyǵa 411 mıllıon teńge tólendi. 15 qańtarǵa deıin barlyq adamdarǵa járdemaqy tóleý josparlanǵan», - deıdi Aıdynjan Narmatov.

Onyń aıtýynsha, ótken jyly járdemaqy taǵaıyndaý úshin otbasynyń tabys kirisi eskerilgen.

«2019 jyly járdemaqy otbasynyń kirisine baılanysty taǵaıyndalatyn. Jańa jyldan bastap kiris esepke alynbaıdy. ıAǵnı, eger otbasynda 4 nemese odan kóp bala bolsa, onda bul otbasyna tabysyna qaramastan aı saıynǵy járdemaqy alýǵa kepildik beriledi. Olardyń mólsheri balalardyń sanyna baılanysty bolady», - dedi ol.

Sondaı– aq, ol AÁK-ti kimder alatynyn aıtty.

«Az qamtylǵan otbasylardy anyqtaıtyn eń tómengi kúnkóris sheginen 70 paıyzdyq ólshemshart sol kúıi qalady. Otbasynyń árbir múshesine AÁK mólsheri buǵan deıingideı otbasynyń jan basyna shaqqandaǵy ortasha kirisi men eń tómengi kúnkóris sheginiń 70 paıyzy arasyndaǵy aıyrma retinde anyqtalady»,- dep qorytyndylady Aıdynjan Narmatov.