Almatyda 1607 ata-ana ákimshilik jaýapqa tartyldy
ALMATY. QazAqparat -Almaty qalasy ákiminiń orynbasary Erjan Babaqumarovtyń tóraǵalyǵymen Almaty qalasy ákimdiginiń janyndaǵy kámeletke tolmaǵandardyń isteri jáne olardyń quqyqtaryn qorǵaý jónindegi vedomstvoaralyq komıssııanyń otyrysy onlaın formatta ótti, dep habarlaıdy QazAqparat tilshisi.
Otyrysqa qalalyq prokýratýra, Polıtsııa qyzmetkerleri men aýdandyq bilim bólimderiniń basshylary qatysty.
Otyrysta birinshi toqsannyń jumys nátıjeleri, sýıtsıdtiń, erte júktiliktiń, quqyq buzýshylyqtar men qylmystardyń, kámeletke tolmaǵandar arasyndaǵy nashaqorlyqtyń aldyn alý jáne eskertý boıynsha qabyldanyp jatqan sharalar, sondaı-aq balalardy jumyspen qamtý, ásirese pandemııany eskere otyryp, balalardyń jazǵy demalysyn uıymdastyrý máseleleri qaraldy.
Bilim basqarmasynyń kámeletke tolmaǵandardyń sýıtsıdtik minez-qulqynyń jáne erte júktiliginiń aldyn alý jáne eskertý boıynsha qabyldanyp jatqan sharalar týraly baıandamasy tyńdaldy. Sýıtsıdtik minez-qulyqtyń aldyn alý maqsatynda «táýekel tobyna» kiretin kámeletke tolmaǵandarmen jumys júrgiziledi, olarmen psıhologııalyq-túzetý jumystarynyń jeke josparlaryna sáıkes jumys júrgiziledi. Mektep psıhologtary úshin biliktiligin arttyrý kýrstary uıymdastyrylady. 2020 jyly mundaı kýrstardy 153 psıholog oqydy. Bıyldan bastap tulǵany damytýdyń respýblıkalyq ortalyǵy bazasynda 365 psıhologtyń barlyǵy kezeń kezeńmen oqıtyn bolady.
Óz kezeginde Almaty qalasy prokýratýra ókilderi «táýekel tobyndaǵy» balalardy taldaý jáne irikteý júıesin jetildirý, sondaı-aq yqtımal sýıtsıdtik minez-qulyq táýekeli anyqtalatyn, aldyn alý sharalary túzetiletin test tapsyrmalarynyń bazasyn jańartý boıynsha usynystar aıtty.
Almatynyń Qoǵamdyq densaýlyq basqarmasynyń járdem stantsııasynan kelip túsken shuǵyl málimetterdi taldaý, sýıdtsıdqa beıim jandarǵa monıtorıng júrgizedi. Daǵdarys jaǵdaılary oryn alǵanda Almaty qalasynyń biryńǵaı Sall-ortalyǵymen biriktirilgen 376-56-60, 116-16 nómirleri boıynsha senim telefony jumys isteıdi. Jyl basynan beri senim telefonyna Almaty qalasynyń turǵyndarynan 1034 qońyraý kelip tústi.
Jasóspirimder arasyndaǵy júktiliktiń aldyn alý maqsatynda «Kásibı psıhologııalyq lıga» QB-men birge joǵary synyp oqýshylary úshin semınar-trenıngter ótkiziledi. Adam reprodýktsııasy qalalyq ortalyǵynda jastar densaýlyq ortalyqtary jumys jasaıdy. Mundaǵy mamandar jastardyń densaýlyǵyn saqtaý máseleleri boıynsha jumys isteıdi. Túsindirý jumystary aıasynda sýıdtsıdtiń aldyn alý boıynsha 16 dáris oqyldy. Ol 1678 adamdy qamtydy, olardyń ishinde kámelettik jasqa tolmaǵandarmen jumys isteıtin psıhologtar, polıtsııa qyzmetkerleri, kámeletke tolmaǵandarmen tyǵyz qarym-qatynas jasaıtyn mektep jáne kolledj qyzmetkerleri bar.
Almatynyń ıývenaldy polıtsııasy 2021 jyldyń 1 toqsanynyń qorytyndysy boıynsha kámeletke tolmaǵandar arasyndaǵy quqyq buzýshylyqtyń aldyn alý boıynsha málimetter usyndy. Qabyldanǵan sharalardyń nátıjesinde Almaty qalasynda jasóspirimder qylmysy 36%-ǵa, onyń ishinde aýyr qylmys túrleri 16,6%-ǵa tómendedi. Bul rette qylmystyń 52,6%-yn syrttan kelgen jasóspirimder jasaǵan. Kámeletke tolmaǵandarǵa qatysty jasalǵan qylmystar sany 24,3%-ǵa azaıdy.
Kámeletke tolmaǵandardyń túngi ýaqytta oıyn-saýyq mekemelerinde jáne zańdy ókilderiniń alyp júrýinsiz turǵyn úı-jaılardan tys jerlerde bolǵany úshin 1607 ata-ana ákimshilik jaýapkershilikke tartyldy.
Saǵat 22.00-den keıin kámeletke tolmaǵandardy zańdy ókilderiniń alyp júrýinsiz oıyn-saýyq mekemelerine kirgizgeni úshin ÁQBtK-niń 132-baby boıynsha oıyn-saýyq mekemeleriniń 42 laýazymdy adamy ákimshilik jaýapkershilikke tartyldy.
Kámeletke tolmaǵandarǵa temeki satqany úshin ÁQBtK 423-baby boıynsha 21, alkogol ónimderin satqany úshin ÁQBtK-niń 200-baby boıynsha 31 jeke kásipker ákimshilik jaýapkershilikke tartyldy. Balalardy tárbıeleý jónindegi mindetterdi tıisinshe oryndamaǵany úshin 15 adamǵa ata-ana quqyqtarynan aıyrý túrinde sońǵy shara qoldanyldy, 115 ata-ana ákimshilik jaýapkershilikke tartyldy.
Almaty qalasy ákiminiń orynbasary, komıssııa tóraǵasy Erjan Babaqumarov kámeletke tolmaǵandardyń ómiri men quqyqtaryn qorǵaý jónindegi jumystaǵy ózekti máselelerdi atap ótip, jetekshilik etetin basqarmalar tarapynan jumysty kúsheıtýdi tapsyrdy.
Komıssııa janynan kámeletke tolmaǵandardyń quqyǵyn qoldaý jáne olarǵa der kezinde mán beretin jedel shtab qurylady. Onyń quramyna qalalyq qurylymdardyń basshylary, aýdan ákimderiniń orynbasarlary, quqyq organdarynyń jáne ÚEU ókilderi enedi.
Aýdandyq bilim bólimderine jáne bilim berý mekemeleriniń basshylyǵyna onlaın oqýdaǵy oqýshylardy baqylaý tásilin qaıta qaraý tapsyryldy.
