Almatyda «16 qyz» fılminiń aldyn ala kórsetilimi ótti (FOTO)
ALMATY. QazAqparat - Almatyda Sh.Aımanov atyndaǵy «Qazaqfılm» kınostýdııasynyń týyndysy «16 qyz» fılminiń aldyn ala kórsetilimi ótti.
Onda basty rólderdi Berik Aıtjanov, Asha Mataı, Ánýar Nurpeıisov, Gúljamal Qazaqbaeva, Jánııa Djýrınskaıa somdaǵan.
«Fılm 2014 jyly Sháken Aımanovtyń 100 jyldyq mereıtoıyna arnap túsirildi. Túsirilim jumystary Baıanaýylda ótti. Basty keıipkerdiń jumys isteıtin mektebine ataqty kınorejısserdiń aty berilgen. Kınoda qalany aralap júrgende Shákenniń týǵanyna 100 jyl tolýyna oraı bılbordtar kezdesedi», - dedi prodıýser Aıdarhan Ádilbaev.
Kıno osy ýaqytqa deıin tehnıkalyq sebepterge baılanysty jaryq kórmedi.
Oqıǵa jelisi nemereli bolýdy ańsaǵan Nurjan men Sálımanyń úıinde órbıdi. Qazaqtyń eski «belquda» saltymen balasy Baýyrjanǵa bir tanysynyń qyzyn alyp bergisi keledi. Ol qyz bolsa óziniń súıgen jigiti bar. Al Baýyrjannyń kóńili basqada.
Qosylýdy armandaǵan ǵashyqtar birge bolý úshin túrli aıla tásilderge kóshedi.
Aıta ketý kerek, fılm Qazaqstannyń kórkem jerlerinde Almaty, Taldyqorǵan, Sharyn shatqalynda, Pavlodar oblysynyń Baıanaýyl aýdanynda túsirildi.
Fılm saýndtregi «Dos-Muqasan» tobynyń «16 qyz» ánin Qaırat Nurtas oryndaǵan.
