Almatyda 1561 maıdanger men olarǵa teńestirilgen 4,5 myń ardager bar - qala ákimi
Bul jaıly búgin Almatydaǵy 28 panfılovshy-gvardııashylar saıabaǵyndaǵy Jeńis kúnine arnalǵan saltanatty jıynynda qala ákimi Ahmetjan Esimovtyń quttyqtaý sózinde aıtyldy.
«Soǵys jyldary bizdiń jerimiz maıdanǵa 1 mıllıon 366 myń jaýynger berdi. Olardyń kóbi maıdan dalasyndaǵy shaıqastarda qaldy. Qazirgi tańda Almatyda 1561 Uly Otan soǵysyna qatysýshy men olarǵa teńestirilgen 4,5 myń ardager turady. Osydan 4 jyl buryn shahar basshysy retinde osynda ardagerlerdi alǵash ret quttyqtadym. Ol kezde maıdangerlerdiń sany 2900 bolatyn, qazir 1561-i ǵana qaldy,- deıdi A.Esimov.
«Jeńis kúni men úshin de erekshe qasıetti, qasterli kún. Ákem 1938 jyly áskerge shaqyrylyp, aldymen fın soǵysy, sodan keıin Uly Otan soǵysyna qatysty. Onda 2 ret alǵan aýyr jaraqatynan keıin 1944 jyly elge oralady. Ol kisi osy Jeńis kúngi merekege qatysarda ylǵı da jaqsy kıimderin kıip, soǵysta alǵan barlyq nagradalaryn omyraýyna taǵyp shyǵyp, adagerlermen kezdesip maıdandas dostaryn eske alatyn. Bala kezimde ony onsha túsinbegen shyǵarmyn. Alaıda eseıe kele ony aıqyn sezinip, tereń túsine bastaıdy ekensiń. Ol kisilerdiń kórgen qıyndyqtaryn eshqashan da umytpaýymyz kerek. Olardy úlgi tutyp, óz estelikteri arqyly jastardy otansúıgishtikke, patrıottyqqa tárbıeleý jumysyn árdaıym jandandyryp otyrý qajet», - dedi Almaty ákimi.
