Almatyda 15 órt sóndirý deposy jetispeıdi
Qazirgi ýaqytta megapolıstiń órtke qarsy qaýipsizdigin tek 19 órt sóndirý bólimshesi qamtamasyz etedi. Normalarǵa sáıkes bir órt sóndirý deposynyń qyzmet kórsetý radıýsy 3 shaqyrymnan aspaýy tıis. Qalanyń ósýi, turǵyn úı-kommýnaldyq ınfraqurylymnyń damýy, kólik júktemesi jáne halyq sanynyń ulǵaıýy eskerilgen jaǵdaıda, Almatyda búginde 15 órt sóndirý deposy jetispeıdi. Órt sóndirý bólimsheleriniń tapshylyǵy qutqarýshylardyń tótenshe jaǵdaı ornyna kelý ýaqytyna tikeleı áser etedi.
Jumys sapary barysynda qala basshysyna Bostandyq aýdany «Nur-Alataý» shaǵyn aýdanynda salynyp jatqan órt sóndirý deposy tanystyryldy. Depo «Qazaqfılm», «Alataý», «Nur-Alataý», «Ermensaı», «Kókshoqy» shaǵyn aýdan turǵyndary men 94 kásiporyndy órtten qorǵaýmen qamtamasyz etedi jáne órt ornyna kelý ýaqytyn edáýir qysqartýǵa múmkindik beredi. Erbolat Dosaev ınjenerlik jelilerdi júrgizý máselelerin jedel sheship, osy jyldyń jeltoqsan aıynda nysandy paıdalanýǵa berýdi tapsyrdy.
Aldaǵy jyldary Túrksib, Bostandyq, Naýryzbaı aýdandarynda taǵy úsh órt sóndirý deposyn salý josparda.
Búginde Almaty órt sóndirýshileriniń qaramaǵynda 183 mashına bar, onyń ishinde órt sóndirý avtotsısternalary, órt sóndirý-qutqarý avtomobılderi, mototsıklder jáne taǵy basqalary. Qala basshysy materıaldyq-tehnıkalyq jaraqtandyrýdy jaqsartý jáne qutqarýshylardyń jyldamdyǵyn arttyrý maqsatynda qosymsha 10 avtokólik satyp alýǵa qarajat bólýdi tapsyrdy. Erbolat Dosaev bıik ǵımarattardyń joǵarǵy qabattarynda qutqarý operatsııalaryn júrgizý úshin teleskopııalyq kótergishteri bar úsh mashınany satyp alý rásimin jedeldetýdi mindettedi. Qazirgi ýaqytta Almatyda osyndaı nebári úsh avtomobıl ǵana bar.
Almaty ákimi QR TJM «Apattar medıtsınasy ortalyǵy» mamandarynyń materıaldyq-tehnıkalyq jabdyqtalýymen de tanysty. Arnaıy qyzmetke óz ǵımaraty qajet. Erbolat Dosaev qolaıly ýchaskeni tańdaǵannan keıin qajetti obektiniń qurylysyna qarajat bólýge daıyn ekendigin bildirdi. Materıaldyq jaraqtandyrýdy jaqsartý barysynda Almaty ákimi medıtsınalyq qaldyqtardy tazartý úshin qosymsha 5 pnevmatıkalyq jabdyq satyp alýdy tapsyrdy.
Almaty ákimi jer silkinisi týraly erte habarlaýdyń avtomattandyrylǵan júıesin iske asyrý jobasymen tanysty. Joba 28 seısmostantsııa salýdy kózdeıdi, onyń 11-i ótken jyly paıdalanýǵa berildi, qalǵan 17-si osy jyly iske qosylady. Eskertý júıesi mamyr aıynda «Darmen» mobıldi qosymshasyna engiziledi, ol halyqty seısmıkalyq qaýip-qater, daýyldy gıdrometeorologııalyq qubylystar týraly ýaqtyly habardar etýge múmkindik beredi.
Qala basshysy jer silkinisi týraly derektermen almasý úshin Qyrǵyzstan qyzmetterimen belsendi yntymaqtastyqta jumys jasaýdy tapsyrdy. Kezdesý barysynda qalanyń 1 100 kamerasynan beıneni shyǵarýǵa qabiletti jáne órtterdi anyqtaýǵa jáne qyzmetterge jedel áreket etýge múmkindik beretin vıdeomonıtorıng júıesi kórsetildi.
Almaty ákimi Alataý aýdanyndaǵy №31 bóbekjaı bazasynda yqtımal tótenshe jaǵdaı kezinde halyqty jınaý pýnktteriniń biriniń jumysymen tanysty. Onda tótenshe jaǵdaı kezinde zardap shekken halyqty ýaqytsha ornalastyrý úshin palataly qalashyq ornalastyrylǵan.
Erbolat Dosaev turǵyndardy qabyldaýdy qamtamasyz etý qosymsha jaraqtandyrýdy talap etetinin atap ótti: halyqty jınaý pýnkterin materıaldyq qamtamasyz etý boıynsha naqty standarttardy engizý, onyń ishinde kúzgi-qysqy aýa raıy jaǵdaılaryna beıimdelgen palatkalardy satyp alý qajet.
Erbolat Dosaev Alataý aýdanyndaǵy azamattyq qorǵanys qurylystarynyń birine bardy. Shamamen 50 jyl buryn salynǵan qorǵaný orny 150 adamǵa arnalǵan. Strategııalyq mańyzdy obekt apatty jaǵdaıda jáne panalanýshylardy qabyldaýǵa daıyn emes.
Aralaý qorytyndysy boıynsha Erbolat Dosaev aýdan ákimdigi memlekettik aktıvter basqarmasymen birlesip bir aı merzimde qorǵanys qurylystaryn kommýnaldyq menshikke qaıtarý jóninde usynystar engizýdi tapsyrdy. Sondaı-aq, qala basshysy yqtımal tótenshe jaǵdaılarda halyqty tirkeý jáne qabyldaý boıynsha biryńǵaı standarttardy ázirleýdi jáne barlyq kommýnaldyq qyzmetterdiń daıyndyǵyn tekserý úshin 2023 jyldyń kúzinde tolyq kólemdi oqý-jattyǵýlar ótkizýdi tapsyrdy.
