Almatyda 15 myńǵa jýyq bala qyzylshaǵa qarsy ekpe almaǵan
ALMATY. QazAqparat – Almatyda qyzylsha juqtyrýǵa qatysty tirkelgen 91 jaǵdaıdyń 73-inde syrqat zerthanalyq jaǵdaıda rastaldy. Bul týraly Óńirlik kommýnıkatsııalar qyzmetinde qalalyq Sanıtarııalyq-epıdemıologııalyq baqylaý departamenti basshysynyń orynbasary Ásel Qalyqova aıtty, dep habarlaıdy QazAqparat tilshisi.
«Qyzylshanyń zerthanalyq rastalǵan 73 jaǵdaıynyń 56-sy (76,7%) der kezinde qyzylshaǵa qarsy egilmegender, onyń ishinde 25 (50,0%) ata-anasynyń ekpeden bas tartýy, 16 (28,6%) medıtsınalyq qarsy kórsetilim, 7 (12,5%) vaktsınatsııa jasyna jetpeýi jáne 6 (9,6%) belgisiz ımmýndyq statýsy bolý saldarynan boldy», – dedi spıker. Ol sondaı-aq Almatyda qyzylsha aýrýynyń taralýyna kóshi-qon úderisi áser etkenin atap ótti.
Almaty qalalyq qoǵamdyq densaýlyq saqtaý basqarmasy basshysynyń orynbasary Nazgúl Imanǵalıevanyń sózinshe, Almatyda vaktsına almaǵan 14 884 bala bar, onyń ishinde 1-6 jas aralyǵyndaǵy 6 124 bala, 7-17 jas aralyǵynda 8 760 bala, túrli sebepterge baılanysty ekpeden bas tartqan 5688 bala bar.
«Ata-analardy balalarynyń densaýlyǵyna beı-jaı qaramaýǵa shaqyramyn. Balalar arasynda qyzylshamen aýrýdyń tómendeýine Qazaqstannyń Ulttyq ekpe kúntizbesine sáıkes josparly ımmýndaý ǵana yqpal etedi», - dedi ol.
Mamandar qyzylsha juqpasy men aýrýdyń asqynýynyń aldyn alýdyń tıimdi joly vaktsınatsııa ekenin aıtady. Máselen, ótken jyly profılaktıkalyq is-sharalar kesheniniń nátıjesinde Almaty qalasynda aýrýshańdyqtyń epıdemıologııalyq jaǵdaıyn turaqtandyrýǵa jáne aýrýdyń tirkelýin birli-jarym jaǵdaıǵa deıin tómendetýge múmkindik týǵan.
Aıta keteıik, qyzylsha – aýa-tamshy joldary arqyly juǵatyn jiti vırýstyń ınfektsııa.
