Almatyda 15 myń muǵalim jalaqysyna ústemeaqy almaǵan
ALMATY. QazAqparat – Almatyda 15 myń muǵalim kásibı biliktiligine baılanysty taǵaıyndalǵan ústemeaqysyn ala almaǵan, dep habarlaıdy QazAqparat tilshisi.
«Negizgi jalaqy tólenip jatyr. Bizde tek muǵalimniń pedagogıkalyq sheberligine tólenetin 25 paıyz ústemeaqy keshigip jatyr. Óıtkeni, pedagogıkalyq stavkalar kóbeıip jatyr. Bizdiń tarapymyzdan ótinish jiberildi. Shamamen tamyz qyrkúıek aılarynda 2 mlrd teńge kóleminde tólem jiberilýi tıis», - dedi Almaty qalalyq Bilim basqarmasynyń qarjy josparlaý bóliminiń basshysy Ádil Otarbaev.
Onyń aıtýynsha, esep pedagogtardyń stavkasyna baılanysty júredi.
«Búginde Almaty boıynsha 15 myń muǵalimniń ústemeaqysy keshigip jatyr»,- dedi spıker.
Aıta ketý kerek, 2020 jyldyń 1 qyrkúıeginen ústemeaqy balabaqsha tárbıelenýshilerine, ádistemelik kabınetterdiń muǵalimderine, qosymsha bilim beretin muǵalimderge, kolledj muǵalimderine de tólenetin boldy.
