Almatyda 15 812 bótelke kontrafaktilik ishimdik joıyldy

ALMATY. QazAqparat- Almaty qalasynyń salyq ınspektorlary zańsyz aınalymnan alynǵan 15 812 bótelke kontrafaktilik ishimdikti joıdy.

Bul týraly búgin Almaty qalasy boıynsha salyq departamentiniń baspasóz qyzmeti habarlady.

Bul shara qala jurtshylyǵynyń birlese kúsh salýy arqasynda júzege asty, delingen habarlamada.

Málim bolǵanyndaı, sońǵy kezderi tutynýshylarmen qatar, óndirýshilerden de aryzdar kóptep túsip jatyr. Óıtkeni olardyń brendi qoldan jasalynýda. Sondyqtan salyq departamenti ústimizdegi jyldyń basynan beri alkogoldi ónimder satatyn 37 mekemege tekserý júrgizdi. Solardyń 33-inde zań buzýshylyqtar tirkeldi. Nátıjesinde 32 myń bótelkeden astam spırttik ishimdik tárkilendi.

Endi alkogoldi ónimder naryǵynda eńbek etetin zań buzýshylarǵa qatysty «Ákimshilik quqyq buzýshylyqtar týraly» QR Kodeksiniń 163,214, 357-1 baptary boıynsha aıyppul sharalaryn qoldaný kózdelgen.

Bul jerde alkogoldi ónimder naryǵyndaǵy jıi buzylatyn zań buzýshylyqtardy eske sala ketken jón. Olar: lıtsenzııasyz jumys isteý, alkogoldik ónimderdiń jóneltpe qujattarsyz, tirkeý-baqylaý markasynsyz aınalymy nemese markanyń jalǵan bolýy.

Kontrafaktilik alkogolderdi joıý, sot organdarynyń sheshimi boıynsha júzege asyrylady. Olarǵa ákimshilik zań buzýshylyqqa qatysty maerıaldar tabys etiledi.

Almaty qalasy boıynsha salyq departamenti janynda 2010 jyly alkogoldik ónimderdi testileý pýnkti ashylǵan bolatyn. Mekemeniń basty mindeti - qala turǵyndarynyń kúdik týǵyzatyn alkogolderge qatysty aryzdary boıynsha der kezinde shara qoldaný.

Osy másele boıynsha múddeli tulǵalardyń 272-11-60 telefon nómiri boıynsha habarlasýlaryna bolady.