Almatyda 14 polıtseıdiń jemqorlyqqa jol bergeni anyqtaldy – Qanat Taımerdenov

ALMATY. QazAqparat – Almaty qalalyq Polıtsııa departamentiniń bastyǵy Qanat Taımerdenov tártip saqshylary arasynda sybaılas jemqorlyqqa qarsy kúres qalaı júrgizilip jatqanyn aıtty, dep habarlaıdy QazAqparat tilshisi.

«Iıa, ókinishke qaraı bizde jemqorlyq áreketteri kezdesedi. Bizde osy kezeńde vedomstvanyń 14 qyzmetkeri sybaılas jemqorlyq quqyq buzýshylyq jasaǵany úshin ustaldy. Olardyń basym bóligin ózimizdiń ishki qaýipsizdik bólimi anyqtady. Biz eshteńe jasyrmaımyz jáne sybaılas jemqorlyqqa qatysty kez-kelgen quqyq buzýshylyqqa qarsymyz. onymen ashyq túrde kúresemiz», - deıdi ol.

Sonymen qatar, Polıtsııa departamentiniń basshysy megopolıstegi barlyq polıtsııa basqarmalarynda sybaılas jemqorlyqqa qarsy is-sharalar júrgizilip jatqanyn aıtty.

«Bizde ózimiz quratyn táýekel toptary bar, solardyń árqaısysyna tekserý júrgizemiz. Iıa, faktiler bar, biz muny ashyq jarııalaımyz. Qazir olar boıynsha jumys istep jatyrmyz. Ótken jylmen salystyrǵanda, árıne, sybaılas jemqorlyq quqyq buzýshylyqtardyń azaıǵany baıqalady, biraq biz muny túbegeıli joıǵymyz keledi», - dep qorytyndylady Qanat Taımerdenov.