Almatyda 14 myńnan astam jumyssyz adam anyqtaldy - ákim
ALMATY. QazAqparat - Almaty ákimi Baýyrjan Baıbek 235 myń qala turǵynynyń áleýmettik statýsy ózgerip, ózin ózi jumyspen qamtyp júrgen azamattar salyq tóleı bastaǵanyn aıtty, dep habarlaıdy Qazaqparat tilshisi.
Búgin halyq aldynda esep bergen Almaty ákimi Baýyrjan Baıbek 2017 jyly jumyspen qamtý salasyn zańdastyrý máselesinde birqatar jumystar atqarylǵanyn jetkizdi.
«Qalanyń jumyspen qamtý bazasynda 235 myń adamnyń áleýmettik statýsy ózgerdi. Páterin jalǵa bergen, jekeleı adam tasymalymen jáne bala oqytýmen aınalysyp kelgen 22 myńǵa jýyq adam tirkelip, salyq tóleı bastady. Buryn aqshany konvert arqyly alyp kelgen 1,5 myńǵa jýyq jaldamaly jumysshylar eńbek shartyna otyryp, áleýmettik qamsyzdandyrý baǵdarlamalaryna endi. Sonymen qatar, ýaqytsha jumyssyz 14 500 turǵyn anyqtalyp, tirkeýge alyndy. Olardy jumysqa ornalastyrýdy qamtamasyz etý kerek», - dedi Baıbek.
Almaty ákimi 2017 jyldyń qyrkúıek aıynan bastap, qalalyq jumyspen qamtý ortalyǵy jańa formatqa aýysqanyn eske sala ketti.
«Endi «bir tereze» júıesi arqyly eńbek bırjasyna shyǵýǵa bolady. Onda elektrondy túrde 35 myń bos jumys orny tirkelgen. Sondaı-aq, atalǵan júıe arqyly bala kútimine baılanysty tólemderdi elektrondy túrde resimdep, eńbek qatynasyn zańdastyrýǵa bolady. Jalpy, daǵdarysqa qarsy memlekettik baǵdarlamalardyń arqasynda byltyr 45 myń jumys orny quryldy. Bul 2016 jylmen salystyrǵanda 2 esege kóp», - dedi megapolıs basshysy.
Aıta keteıik, bıyl Almatyda Jol kartasy baǵdarlamasy aıasynda 32 myń adam jumyspen qamtylady dep josparlanǵan.
