Almatyda 14 eldiń onkologtary qaterli isik dertinen emdeý joldaryn talqylady
8-9 qazanda Almatyda Dúnıejúzilik densaýlyq saqtaý uıymynyń Eýropalyq óńirlik keńsesiniń qoldaýymen TMD memleketteri (Eýrazııalyq aımaq) balalar onkologııasy salasy sarapshylarynyń ekinshi kezdesýi ótti.
14 el sarapshylary Eýrazııalyq aımaqtaǵy elder arasynda onkologııalyq dertke shaldyqqan balalardyń ómir súrý uzaqtyǵyn jaqsartý, balalar onkologııasy jáne gematologııasy salasyndaǵy ózekti máselelerdi talqylaý, tájirıbe almasý, balalar onkologııasyndaǵy ortaq máselelerdi sheshý, búgingi jaǵdaıyn saraptap, damýdyń durys jolyn aıqyndaýdy talqylady.
Halyqaralyq deńgeıde ótken kezdesýge QR Densaýlyq saqtaý mınıstrliginiń ókilderi, Dúnıejúzilik densaýlyq saqtaý uıymynyń ókilderi, Amerıkanyń onkologııalyq aýrýlardy emdeıtin eń jetekshi klınıkasy bolyp tabylatyn Áýlıe Iýde (Sent Djýd) balalar gospıtaliniń birinshi basshylary men dárigerleri (St. Jude Global Alliance), Qazaqstandaǵy onkologııalyq jáne gematologııalyq qyzmettiń damýyna zor úles qosyp kele jatqan Reseıdiń D. Rogachev atyndaǵy balalar gematologııasy, onkologııasy men ımmýnologııasy federaldyq ǵylymı-klınıkalyq ortalyǵy, Belarýs eliniń Balalar onkologııasy, gematologııasy men ımmýnologııasy ǵylymı-praktıkalyq ortalyǵynyń basshylary men onkolog-dárigerleri keldi.
Sondaı-aq Moldova, Ýkraına, Grýzııa, Armenııa, Tájikstan, Ózbekstan, Túrikmenstan, Ázerbaıjan, Mońǵolııa, Qazaqstan, Qyrǵyz elderiniń onkologııa jáne gematologııa salasynyń jetekshi mamandary men sarapshylary qatysty.
Eske sala keteıik, birinshi kezdesý 2018 jyldyń 23-25 sáýir kúnderi aralyǵynda Máskeý qalasyndaǵy D.Rogachev atyndaǵy balalar gematologııasy, onkologııasy men ımmýnologııasy federaldyq ǵylymı-klınıkalyq ortalyǵynda ótken edi.
«Búgingi kezdesýdiń Qazaqstan balalar onkologııasy men gematologııasy salasy úshin mańyzy zor. Álemdik standarttarǵa saı, sapaly joǵary tehnologııalyq medıtsınalyq kómekpen qamtamasyz ete otyryp balalardyń densaýlyǵyn qorǵaý men nyǵaıtý Pedıatrııa ortalyǵynyń basty maqsaty. Qazaqstandaǵy onkologııalyq jáne gematologııalyq qyzmettiń damýyna zor úles qosyp kele jatqan Reseıdiń D. Rogachev atyndaǵy onkologııalyq ortalyqqa, Dúnıejúzilik densaýlyq saqtaý uıymyna jáne Amerıkanyń Sent Djýd balalar gospıtaline búgingi mańyzdy sharany uıymdastyrýǵa muryndyq bolǵandary úshin úlken alǵysymdy bildiremin. Bul kezdesý balalar onkologııalyq qyzmetiniń damýyna tyń serpin berip, Eýrazııalyq aımaq sarapshylarynyń yntymaqtastyǵyn odan ári arttyra túsedi dep senemin», - dedi Pedıatrııa jáne balalar hırýrgııasy ǵylymı ortalyǵynyń basshysy Rıza Boranbaeva.
«Ókinishke oraı, búgingi kúni qaterli onkologııalyq aýrýlar álem boıynsha balalar óliminiń jıileýine soqtyryp otyr. Jáne ol TMD elderinde de oryn alýda. Biz jetekshi ortalyqtardyń halyqaralyq sarapshylarmen yntymaqtasa otyryp, Dúnıejúzilik densaýlyq saqtaý uıymy men ár memlekettiń qoldaýy arqyly qaterli dertke shaldyqqan balalardyń ómir súrýin uzartý kórsetkishin jaqsartýdy maqsat etip otyrmyz. Bizdiń birikken komandamyz bul maqsatqa birge jete alady dep úmittenemin», - dedi Áýlıe Iýde (Sent Djýd) balalar gospıtaliniń ókili Asıa Agýlnık.
14 elden kelgen mamandar aldaǵy ýaqytta qaterli isik pen aq qan aýrýyna shaldyqqan balalardyń ómir súrý uzaqtyǵyn jaqsartý jolynda kúsh biriktirmek. Jıyn barysynda birikken joba joǵary sapaly medıtsınalyq kómekti alýǵa múmkindik jasaıtyn, onkologııalyq aýrýlarǵa shaldyqqan balalardyń ómir súrý uzaqtyǵyn jaqsartý jolyndaǵy jahandyq bastamany iske asyrýdaǵy alǵashqy qadam ekendigi atap ótildi. Kezdesýde qatysýshylar balalar onkologııasy jáne gematologııasy salasyndaǵy ózekti máselelerdi talqylap qane qoımaı, búgingi jaǵdaıyn saraptap, ózara pikir almasty.
Eki kún boıy ótken jıynda ár eldiń mamandary balalardaǵy qaterli isik aýrýlaryn dıagnostıkalaý men emdeýdiń zamanaýı ádis-tásilderimen, medıtsınalyq kómek kórsetýdi uıymdastyrýdaǵy tájirıbelerimen bólisti.
«Biz Qazaq eline birinshi ret kelip otyrmyz. Kelýimizdiń basty maqsaty jahandyq deńgeıde barlyq balaǵa qaterli dertti jeńýge kómektesý. Biz álemdegi ár balanyń óz jasyna jetpeı ómirden ótpeýi kerek dep sanaımyz. Jáne bul máseleni Dúnıejúzilik densaýlyq saqtaý uıymynyń aldyna qoıǵan edik. Atalmysh uıymnyń qoldaýymen ótip jatqan búgingi shara osy maqsattyń alǵashqy qadamy. Biz barlyq TMD elderine óz kómegimizdi kórsetkimiz keledi. Atap aıtqanda, dárigerler men meıirbıkelerdiń biliktilikterin arttyrý, bilim berý, ǵylymdy damytý, onkologııalyq aýrýlardy dıagnostıkalaý men emdeý ádis-tásilderimizben, tehnologııalarymyzben bólisýge ázirmiz», - dedi Amerıkanyń Sent Djýd balalar onkologııalyq gospıtaliniń vıtse-prezıdenti Karlos Rodrıgez-Galındo.
Ol Qazaqstannyń balalar onkologııa salasynyń deńgeıin joǵary baǵalady.
«Búgin Pedıatrııa ortalyǵyn aralap, jumys barysymen tanysyp, onkologııa men gematologııa jáne transplantologııa bólimderinde boldyq. Balalar úshin joǵary deńgeıde barlyq jaǵdaılar jasalǵan eken. Barlyǵy kóńilimizden shyqty. Ásirese, ortalyqtandyrylǵan júıesi men emdeý sapasyna tánti boldyq», - dedi K.Rodrıgez-Galındo.
TMD elderi ishinde Qazaqstanda alǵash ret ár elden kelgen meıirbıkeler úshin qaterli dertke shaldyqqan naýqastarǵa jalpy jáne mamandandyrylǵan palıatıvtik kómek kórsetý erekshelikteri boıynsha oqytý dárisi ótkizildi. Bul dáris aldaǵy ýaqytta on-laın rejiminde jalǵasyn tappaq. Alynǵan bilim óz kezeginde meıirbıkelerge naýqastardaǵy aýrýlardyń ereksheligin eskere otyryp, terapııalyq, aldyn alý, dıagnostıkalaý jáne ońaltý sharalaryn júzege asyrýda kómekteseri sózsiz.
