Almatyda 133 PIK ákimshilik jaýapkershilikke tartyldy

ALMATY. QazAqparat - Almatyda Turǵyn úı saıasaty basqarmasy óz mindetin oryndamaǵan 133 PIK-ti jaýapkershilikke tartty. Bul týraly qalalyq ákimdiktiń baspasóz qyzmetinen habarlady.

Bul kooperatıvter qys bastalǵaly beri aýlalaryn qardan tıisti dárejede tazalamaǵan.

Qaladaǵy kógaldandyrý jáne abattandyrý erejesine sáıkes barlyq júrginshi joldary, aýla aýmaqtary, kólik joldary qar túsken soń tez arada tazalanýy kerek. Eger kóktaıǵaq bolsa, qum nemese tuz sebilýi tıis.

Sonymen qatar PIK-ter shatyrdaǵy muz súńgilerin de tazalaýǵa mindetti.

Muz súńgilerin tazalaý úshin aqy talap etken «Jansaıa» PIK basshylyǵy jaýapkershilikke tartyldy.

2018 jyly 306 PIK jumysy tekserilgen bolatyn. Nátıjesinde 151 eskertý jasalyp, aıyppuldar salyndy.

Qalalyq Turǵyn úı saıasaty basqarmasynyń habarlaýynsha, turǵyndar eger PIK jumysyna kóńili tolmasa, birigip PIK tóraǵasyn jumystan shyǵara alady. Sonymen qatar, kooperatıv quramynan shyǵyp, basqa kooperatıv tańdaı alady.

Turǵyn úı basqarmasynan tolyq aqparatty 224-14-04, 225-14-31, 225-12-04 telefondary arqyly bilýge bolady.