Almatyda 1300 kópbalaly ana jumysqa ornalasý úshin túrli kýrsta oqyp jatyr

ALMATY. QazAqparat- Almaty qalasy Áleýmettik ál-aýqat basqarmasynyń basshysy Nazıra Toǵyzbaeva onlaın brıfıng barysynda qalada 24 426 kóp balaly otbasy turatynyn aıtty. «Baqytty otbasy» aýdandyq ortalyqtary jumys istegen eki jyl analardy qoldap keledi, qazirgi ýaqytta onda «ISKER ANA» áıelder kásipkerligi baǵdarlamasy júzege asyrylyp jatyr, dep habarlaıdy QazAqparat tilshisi.

Bıyl úsh aıda ortalyqtarda 1 013 adam tirkelgen, 9,5 myń adam aqparattyq-konsýltatsııalyq jáne resýrstyq qoldaý aldy, 1 myń adam ádistemelik jáne zań kómegine júgindi.

«927kópbalaly ana tulǵalyq ósý, bala tárbıesi, kóshbasshylyq, otbasylyq qundylyqtar, psıhologııa boıynsha bazalyq trenıngterden ótti. Taǵy 1361 adam kompıýterlik saýattylyq, shashtaraz óneri, vızaj, aspazdyq, kondıterlik, pishý jáne tigý daǵdylary boıynsha oqý kýrstarynan ótýde. «Baqytty otbasy» ortalyqtary jumysqa ornalasýǵa, «Eńbek» memlekettik baǵdarlamasy boıynsha belsendi sharalarǵa joldaý kezinde kómek kórsetedi. Mysaly, bıyl 14 ana turaqty jumysqa, 63 ana ýaqytsha jumys oryndaryna ornalastyryldy», – dedi Nazıra Toǵyzbaeva.

«Baqytty otbasy» ortalyqtarymen qatar Alataý aýdanynyń az qamtylǵan otbasylary úshin dástúrli qolónerdi damytý ortalyǵy jumys isteıdi, onyń maqsaty – dástúr men ádet-ǵurypty, qolónerdi damytý, úlkenderden kishige úıretý arqyly urpaqtar sabaqtastyǵyn qalyptastyrý.

Basqarma basshysy 2020 jyly iske qosylǵan «Shyńǵa órleý» áleýmettik klýby týraly aıtyp berdi. Oǵan qoǵamdyq ómirge at salysyp júrgen balalar, aǵa býyn ókilderi, múgedek adamdar tartylǵan. Qala ákiminiń tapsyrmasy boıynsha mundaı klýbtar Almaty qalasynyń árbir aýdanynda ashyldy. Búgingi tańda 9 bólimshe jumys isteıdi. Offlaın rejıminde az qamtylǵan otbasylardan 436 bala qamtyldy, onlaın rejımde qalanyń 6 aýdanynan 286 bala oqıdy.

Zeınetkerler men múgedektigi bar tulǵalardan 130 kásibı pedagog jumysqa ornalastyryldy, olar bastaýysh mekteptiń negizgi jalpy bilim berý pánderi boıynsha avtorlyq sabaqtardy (matematıka, qazaq tili, orys tili, aǵylshyn tili, IT), sondaı-aq qosymsha bilim berýdiń shyǵarmashylyq jáne sporttyq sabaqtaryn (shahmat, qolóner, horeografııa, mýzyka, akterlik sheberlik) usynady. Jyl sońyna deıin turmysy tómen otbasylardan shyqqan 2 myńnan astam bala men múgedek balalar qamtylatyn bolady.

Jalpy Almatyda zeınetkerlerdiń ómir súrý sapasyn arttyrýǵa qamqorlyq kórsetiledi.

«Almatyda 232,6 myńǵa jýyq zeınetker turady. Olardyń ómir súrý sapasyn arttyrý maqsatynda 2018 jyldan bastap «Belsendi uzaq ómir» jol kartasy iske asyrylýda. Biz skandınavııalyq júris, emdik ıoga, emdeý-saýyqtyrý gımnastıkasy, kompıýterlik saýattylyq, qazaq jáne aǵylshyn tilderi, eńbek terapııasy jáne t.b. boıynsha qyzmetter kórsetemiz», – deıdi basqarma basshysy.