Almatyda 130-ǵa jýyq urlanǵan uıaly telefon ıelerine qaıtaryldy
ALMATY. QazAqparat - Almaty polıtseıleri 130-ǵa jýyq urlanǵan uıaly telefondy ıelerine qaıtardy, dep habarlaıdy QazAqparat tilshisi. Bul mobıldik qurylǵylar arnaıy operatsııa kezinde tárkilendi.
Almaty polıtseıleri jeke úılerdiń birinde tintý júrgizgen. Belgili bolǵandaı, bul úıge urlanǵan taýarlardy turaqty satyp alýshylar jıi keledi eken.
Eske sala keteıik, bıyl arnaıy operatsııa barysynda qylmystyq jolmen tabylǵan 464 mobıldi qurylǵy tárkilengen edi.
«Krımınaldyq polıtsııa qyzmetkerleri arnaıy jasaq sarbazdarynyń kómegimen aǵaıyndy eki azamatty ustady. Olar urlanǵan uıaly telefondar men basqa da qondyrǵylardy satyp alyp júrgen. Mundaı qondyrǵylardyń iri partııasy Qyrǵyzstan men Ózbekstanǵa jóneltilýge daıyn bolǵan. Kúdiktilerdiń turǵylyqty jerinde ótkizilgen sanktsııalanǵan tintý kezinde 464 smartfon, 1 noýtbýk jáne 4 qol saǵat tabylyp, tárkilendi. Sotqa deıingi tergeý QR QK-niń 196-babynyń 2-bóligi (Kórineý qylmystyq jolmen tabylǵan múlikti ıemdený nemese ótkizý) boıynsha júrgizilýde. Qazirgi ýaqytta osy uıaly telefondardyń ıelerin anyqtaý boıynsha sharalar qabyldanyp jatyr», – dedi Polıtsııa departamenti bastyǵynyń orynbasary Berik Ábilbekov. Tergeýshiler ıesi anyqtalǵan smartfondardy qaıtarýdy bastady. Keshe Polıtsııa departamentine uıaly qurylǵylaryn alý úshin shamamen 30 adam keldi.
«Keshki saǵat 7 men 8 arasynda «Altyn Orda» bazarynyń janynda belgisiz er adam jol kórsetýimdi ótinip, qarańǵylyqty paıdalanyp, maǵan jaqyndady. Sol kezde ol meniń kúrteshemniń oń qaltasynan telefonymdy urlap ketti. Men polıtsııa qyzmetkerlerine úlken rızashylyǵymdy bildiremin. Olardyń jumystary árdaıym osyndaı jemisti bolsyn», – dedi telefony qıtarylǵan zeınetker.
«Al meniń uıaly telefonymdy kólikten urlap ketti. Ony tapqany úshin polıtsııaǵa rahmet», – dedi taǵy bir turǵyn.
