Almatyda 13 jastaǵy oqýshy joǵalyp ketti
ALMATY. QazAqparat - Almatyda 13 jastaǵy oqýshy joǵalyp ketti, dep habarlaıdy QazAqparat tilshisi.
Eki kúnnen beri qyzynan habar almaǵan ata-ana eriktiler uıymy men polıtsııaǵa habar bergen.
Angelına Fılatovany klastastary sońǵy ret 5 qyrkúıekte kórgen.
8-synyp oqýshysy №9 shaǵyn aýdandaǵy №5 mektepten tańerteńgi saǵat 11:00 shamasynda shyǵyp ketken.
«5 qyrkúıekte mektepke ketken. Onda 7 sabaq bolý kerek bolǵan. Keı sabaqtar bolmaǵan soń balalardy erterek bosatqan. Angelına mektepten belgisiz baǵytta shyǵyp ketken. Ony anam vatsaptan kesh bildi. Barlyq dostaryn, qurbylaryn aralap shyqtyq, eshkim kórmegen», - dedi ápkesi.
Anasynyń aıtýynsha, Angelınanyń áleýmettik jelidegi akkaýnttarynda aqparat jańarmaǵan.
«Qyzym jaman ádetterden aýlaq. Kúdiktenetin de eshteme joq. Telefon qońyraýlaryna detalızatsııa júrgizgende sońǵy ret №1 shaǵyn aýdanda keshe tústen keıin bolǵany belgili boldy. Telefon soqsaq qońyraýdy kótermeıdi. Ne oılarymyzdy da bilmeımiz», - dedi anasy Fılatova Marına.
Angelına Fılatovanyń boıy 150 sm, ústinde qarakók tústi djınsy, aq kúrteshe, aq krossovkı kıgen. Qolynda mektep sómkesi bolǵan.
