Almatyda 13 myńǵa jýyq adam gepatıtke shaldyqqan
ALMATY. QazAqparat - Byltyr Almaty qalasynda 12 747 adam gepatıt juqtyrǵan. Onyń ishinde 361-i naýqas juqpaly dertke alǵash ret shaldyqqan Bul týraly «Áleýmettik medıtsınalyq saqtandyrý qory» KEAQ Almaty qalalyq fılıalynyń dırektory Tileýhan Ábildaev habarlady.
«Shilde aıynyń sońynda dúnıejúzinde Gepatıtke qarsy kúres kúni atap ótiledi. Ókinishke oraı, Almatyda vırýsty juqtyrý kórsetkishi joǵary. Sondyqtan halyqtyń gepatıt týraly saýatyn arttyrý maqsatynda túsindirý jumystaryn júrgizý óte mańyzdy», - dedi ol.
Onyń aıtýynsha, 2017 jyly Qazaqstanda gepatıtpen aýyratyndar sany 70 myńǵa jýyqtaǵan. Aýrýdy jańadan juqtyrǵandar sany - 5 147 adam.
Sarapshylar málimetine súıensek, álemde sozylmaly V gepatıti vırýsyn juqtyrǵandar sany 250 mıllıonnan asady. Al, S gepatıtin 71 mıllıon adam juqtyrǵan. Ólim-jitimniń 96 paıyzy gepatıttiń dál osy eki túrinen bolady, deıdi mamandar.
Qazir A, B, D jáne E gepatıtine qarsy vaktsınalar bar. Ókinishke oraı, olardyń baǵasyn qarapaıym halyqtyń qaltasy kótere bermeıdi. V gepatıtine qarsy salynatyn vaktsına D gepatıtiniń aldyn alýǵa kómektesedi. Al, S gepatıtine qarsy tıimdi vaktsına ázirge jasalǵan joq.
«Búgingi tańda gepatıtten qorǵanýdyń eń tıimdi joly - ekpe saldyrý. Memleket kepildendirilgen tegin medıtsınalyq kómek paketi arqyly azamattarǵa qaýipti aýrýlardyń, sonyń ishinde, gepatıttiń aldyn alýǵa múmkindik berip otyr. Sońǵy 25 jylda Qazaqstanda V gepatıtine shaldyqqandar sany 30 ese azaıǵan. Mindetti medıtsınalyq saqtandyrý engizilgennen keıin de ekpe egý tártibi ózgermeıdi. Qazaqstandyqtar vaktsınany saqtandyrylǵan-saqtandyrylǵanyna qaramastan burynǵydaı tegin saldyratyn bolady.
«Balalardy gepatıtke qarsy egý kestesi bar. Eń alǵash ret nárestelerge týǵannan bastap 4 kúnge deıin ekpe egedi. Ekinshi ret 2 aılyǵynda, úshinshi ret tórt aılyǵynda salynady. Sonymen qatar, medıtsına salasynyń qyzmetkerleri, qan quıdyrǵan patsıentter syndy qaýip-qater tobyna jatatyndarǵa da vaktsına salynýy múmkin», - deıdi Tileýhan Ábildaev.
Jalpy, vaktsına máselesinde jurtshylyqtyń pikiri ekige jarylǵany belgili. Ekpege qarsylyq bildirip júrgender olardyń quramynda balalardy aýtızm, dıabet, skleroz, bedeýlik syndy aýrýlarǵa shaldyqtyryp, zeıin qoıý qabiletin tómendetetin zattar baryn alǵa tartady. Alaıda, DDSU málimetinshe, dál osy ımmýndaý sharasy jyl saıyn 2-3 mıllıon adamdy ólimnen arashalap qalýǵa múmkindik beredi.
