Almatyda 13 avtokóliktiń qatysýymen iri jol apaty boldy
ALMATY. QazAqparat - Búgin Almatyda Jarokov kóshesi men Ál-Farabı dańǵylynyń qıylysynda onnan astam avtokóliktiń qatysýymen iri jol apaty boldy. Oqıǵanyń vıdeosy áleýmettik jelide tarady, dep habarlaıdy QazAqparat tilshisi.
Almaty qalalyq polıtsııa departamenti jol-kólik oqıǵasy búgin 08 saǵat 45 mınýtta Almatynyń Bostandyq aýdanynda bolǵanyn habarlady.
«Jol apatynan 13 avtomobıl zardap shekti. Atalǵan kólikter Jarokov kóshesiniń boıymen soltústik baǵytta kele jatyp soqtyǵysqan. Jol-kólik oqıǵasy saldarynan eki adam zardap shekti. Olar - «Toıota Prado» kóligin basqarǵan 51 jastaǵy áıel jáne «Leksýs» markaly kóliktiń jolaýshysy 12 jasar bala. Zardap shekkenderge medıtsınalyq kómek kórsetildi. Bul derek boıynsha Bostandyq aýdandyq polıtsııa basqarmasy tergeý júrgizip jatyr. Tıisti saraptamalar taǵaıyndaldy», - dedi Almaty qalalyq PD anyqtaý basqarmasynyń bastyǵy, polıtsııa polkovnıgi Oljas Sháripov.
Aıta keteıik, búgin Almaty polıtsııasy qaladaǵy kóktaıǵaqqa baılanysty qala turǵyndaryn jolda saq bolýǵa shaqyrdy.
