Almatyda 12 jyldyq bilim berý júıesiniń máseleleri talqylandy
ALMATY. Tamyzdyń 20-sy. QazAqparat /Erbol Turymbetov/ - Búgin Almatyda QR Bilim jáne ǵylym mınıstri Janseıit Túımebaevtyń qatysýymen «12 jyldyq oqýǵa kóshý tájirıbeleri. 2009-2010 oqý jylynyń qorytyndylary. Tájirıbelik negizgi synyptardyń oqýlyqtary boıynsha oqytýdyń mazmuny men metodıkalyq erekshelikteri, metodologııasy» degen taqyrypta semınar bolyp ótti,
dep habarlaıdy QazAqparat.
Semınarǵa qalalyq jáne oblystyq bilim basqarmalarynyń metodısteri men tájirıbelik mektepterdiń 7-8 synyp muǵalimderi, oqýlyqtar avtorlary qatysty.
J. Túımebaevtyń aıtýynsha, memleket 2020 jylǵa deıin 12 jyldyq bilim berýge tolyǵymen kóshý maqsatyn qoıyp otyr. «Maqsat belgili, túsinikti. Degenmen, ony júzege asyrý úshin bilim salasyndaǵy árbir qyzmetkerde joǵary talaptylyq pen mándi jumys bolý kerek», dedi mınıstr.
12 jyldyqqa kóshýdiń tájirıbelik synyptaryn oqytý 2003 jyly bastalǵan bolatyn. Alǵashynda 51 mektepte oqytyla bastaǵan tájirıbe keıin 104 mektepke deıin ósti. 2006-2007 oqý jylynda alǵashqy iriktelgen mektepter bastaýysh synyptaryn sátti aıaqtady. Al 2007-2008 oqý jylynda olar negizgi synyptarǵa kóshken bolatyn. Onda 6813 oqýshy oqyp jatsa, onyń 4097-si qazaq tildi, 2716-sy orys tildi oqýshylar bolyp otyr.
