Almatyda 12 jastaǵy jasóspirim mektepti ekstern túrinde bitirdi
ALMATY. QazAqparat - Almatyda 12 jastaǵy jasóspirim mektepti ekstern túrinde bitirdi, dep habarlaıdy QazAqparat tilshisi.
Daryndy bala az kúnde Qazaq-Brıtan tehnıkalyq ýnıversıtetiniń stýdenti atanady. Alaıda qazirdiń ózinde óte jas túlekti Súleımen Demırel ýnıversıteti, Halyqaralyq ІT ýnıversıteti, Abylaı han atyndaǵy Shet tilderi jáne halyqaralyq qatynastar ýnıversıteti shaqyryp otyr.
«Výnderkınd» bala 3 jasyna jetpeı-aq, áripterdi qosyp oqı bastaǵan. Al, 4 jasynda eki tańbaly sandardy kóbeıte alatyn, deıdi anasy Jazıra Doskeeva.
«Abzaldyń este saqtaý qabileti óte jaqsy ekendigi bilinetin. Aıtqan nárseni tez qaǵyp alatyn. 2 jasynda kóshege shyǵyp, kólikterdiń markalaryn tanystyrǵan bolatyn ákesi. Kelesi kúni bárin taqyldap aıtyp turdy. 3 jasynan oqydy. Ózimiz de qyzyǵyp neshe túrli tanymdyq kitaptardy ákep otyratynbyz. Sonyń barlyǵyn dalaǵa oınaýǵa shyqpaı az kúnde oqyp taýysyp tastaıtyn», - dedi Jazıra.
Bir qyzyǵy, ata-anasy balany eshqandaı damytý ortalyǵyna bermegen.
Abzal Myrzash №16 mekteptiń orys synybynda 1-2 synypty oqyǵan. 3-shi synyptan 136 qazaq mektep gımnazııasyna qabyldanǵan.
Erekshe daryndy balany muǵalimderi jylda synyptan synypqa sekirtip otyrǵan. Osylaısha, ol 3,5,7,9,11 synyptardy ǵana oqyp nebári 7 jylda 12 jasynda mektep túlegi atandy.
Abzal Myrzashuly mektep baǵdarlamasyn aldyn ala ıgere kele, halyqaralyq, respýblıkalyq olımpıadalarda jeńimpaz atanǵan.
Balanyń ákesi Dáýrenbek Nysanovtyń aıtýynsha, Abzal bıyl Brıtanııa konsýldyǵy janynda IELTS testin tapsyrǵan.
«Jazbasha tapsyrmada «Іri kompanııalar ulttyq oıyndarǵa nege demeýshilik jasaıdy?» degen jasyna saı kelmeıtin taqyrypta esse jazý kerek bolǵandyqtan, baly 5,5 bolyp qaldy», - deıdi ákesi.
Balanyń ata-anasy Abzaldy basynda shetelge oqýǵa jiberýge tyrysqan. Álemdik tehnıkalyq ýnıversıtetter arasynda «ekstern» bitirp kelgen balalardy qabyldaıtyn ýnıversıtetter az eken. Abzaldyń ata-anasy uzaq oılanyp Massachýsets tehnologııa ınstıtýtyn tańdaıdy.
«Alaıda, olarda negizgi talap otbasymen túgel kóship kelý kerek eken. Sonymen Qazaqstannyń ýnıversıtetterin tańdadyq. Balamyz UBT tapsyryp 117 bal alyp shyqty. Abzaldyń baly odan da joǵary bolar edi. Tek oǵan negizgi pánderinen esep shyǵarýǵa kóp ýaqyt ketken», - dedi ákesi Dáýrenbek Nysanov.
