Almatyda 12-shi ret teatr óneri qaıratkerleriniń respýblıkalyq praktıkýmy ótedi
ASTANA. 19 naýryz. QazAqparat - Qazaqstan Respýblıkasynyń Mádenıet jáne aqparat mınıstrligi 28-29 naýryzda Almaty qalasynda Ǵ.Músirepov atyndaǵy Qazaq memlekettik akademııalyq balalar men jasóspirimder teatrynda
sheteldik mamandardyń qatysýymen Teatr óneri qaıratkerleriniń HІІ respýblıkalyq praktıkýmyn ótkizedi, dep habarlady mınıstrliktiń baspasóz qyzmeti.
Praktıkým «Qazirgi zaman teatrlaryndaǵy dástúrler men jańashyldyq» jáne «Teatr syny men onyń zamanaýı teatr úrdisindegi alatyn orny» taqyryptaryna arnalady.
Praktıkým jumysyna Reseı Federatsııasy men Polsha memleketteriniń eńbek sińirgen óner qaıratkeri, mádenıet pen óner salasyndaǵy Máskeý syılyǵynyń laýreaty, Máskeý jýrnalıster odaǵy syılyǵynyń ıegeri, «Teatralnaıa jızn» jýrnalynyń bas redaktory Oleg Pıvovarov jáne teatrtanýshy, rejısser, óner kandıdaty Aleksandr Smolıakov qatysady. Sonymen qatar praktıkýmǵa Qazaqstan teatrlarynyń bas rejısserleri, dırektorlary men kórkemdik jetekshileri, sondaı-aq T.Júrgenov atyndaǵy Qazaq ulttyq óner akademııasynyń stýdentteri shaqyryldy.
Baspasóz konferentsııa 28 naýryz kúni saǵat 10.30-da, al praktıkýmnyń resmı ashylýy 11.00-de ótedi.
Praktıkým aıasynda D.Isabekovtyń «Jaýjúrek» (rej. E.Obaev), T.Temenovtyń «Karmensıta» jáne Sh.Aıtmatovtyń «Qyzyl oramaldy shynarym» (rej. T.Temenov) spektaklderiniń kórsetilimi josparlanǵan.
